Во охридската болница нема алерголог

Алерголошката амбуланта при општата болница во Охрид веќе неколку месеци не работи. Откако алергологот Љубица Андоновска си замина во пензија оваа амбуланта која воедно беше и регионален центар бидејќи тука се лекува пациенти од околните градови, се затвори. Пациентите кои имаат проблем со алергиите загрижени. Прашуваат каде да се јават кога ќе имаат потреба од лекови и преглед. Директорот на болницата Др. Љубен Арнаудов признава дека имаат проблем со недостиг на стручен кадар, но смирува дека се прават сите напори проблемот да се реши. Моментално пациентите се лекуваат на кожното одделение и на интерно, но во тек е процесот на едукација на еден доктор кој ќе работи на оваа проблематика.

Сега појачуваме со уште еден доктор кој го пративме на едукација. Беше четири месеци во Скопје, еден месец во Словенија, а моментално е во Америка. До срединава на месецов треба да се врати. Ќе започне со работа веднаш штом ќе ја добие лиценцата за вршење на таа дејност, вели Др. Арнаудов.

Др. Славица Петровска која е актуелен началник на Одделението за белодробни и туберкулозни заболувања ќе биде алергологот кој во моментов е на доедукација. Ова одделение ќе е една единица во рамките на кожното одделение.

Сега таму има две слободни простории. Во нив ќе биде сместена алерголошката амбуланта. Ќе се работи во две смени така што пациентите ќе можат да  ја посетуваат и попладне. Едната смена ќе ја води доктор од кожното одделение, објаснува Арнаудов.

Директорот на охридската болница ветува дека за помалку од еден месец работите околу отварањето на единицата за алергологија ќе завршат и дека сите пациенти ќе бидат згрижени и соодветно третирани. Тој додава дека и понатаму продолжува праксата во алерголошката амбукланта да се лекуваат пациенти и од околните градови.

{loadposition content9}