Бакрачески очекува добра туристичка сезона, но и посетеност на градот преку цела година

Јануари е најбогатиот месец со празници. За време на новогодишните, но и за повеќето верски празници, туристичкиот бисер Охрид беше преполн со туристи. Тое во суштина е и првиот показател дека на градот му претстои добра туристичка сезона за 2017 година, смета првиот човек на градот Никола Бакрачески. Статистиката на републичкиот завод како и на општинскиот Сектор за туризам покажуваат одличен тренд на бројот на ноќевања и бројот на гости кои што престојуваат во Охрид во текот на целата година, вели градоначалникот.

„И тоа е нашиот концепт, нашата стратегија за развој на туризмот се разликува од сите оние претходно, бидејќи она што ние го нудиме како охридска туристичка понуда треба да претставува збир на настани и активности кои треба да провејуваат во текот на цела година, а да не зборуваме за летна туристичка сезона и сезона која трае само во месеците јули и августл. Се надевам дека во тоа успеавме“.

Нашата работа во претходните 4 години се состоеше во агресивна промоција и маркетинг на охридската туристичка понуда и тука веќе се гледаат резултатите, пренесува Бакрачески.

„Охрид како никогаш досега во неговата историја бил промовиран во голем број часописи, магазини, списанија, телевизии, саеми и тоа ќе го правиме уште поагресивно во периодот што престојува, но маркетингот и промоцијата треба да бидат добро осмислени со добра туристичка понуда во кој ќе има нови содржини, активности и елементи кои што ќе бидат организирани во текот на целата година“.

Бакрачески убедува дека престојат денови на организација на крупни и нови активности кои ќе ја збогатат туристичката понуда на Охрид. Според него тие ќе претставуваат квалитетно и квантитетно нови содржини кои би биле допадливи и атрактивни за сите оние гости кои што сакаат да го посетат Охрид во било кој ден од годината, а не само во летните месеци, бидејќи градот има што да понуди и на културно, историско, природно и духовно ниво.