Во охридската градинка немаат официјално известување кога ќе биде спроведен скринингот зa КОВИД – 19 на вработените

Во објектите на охридската градинка  „Јасна Ристеска“ веќе втора недела интензивно се работи на подготовки за отворање и враќање на дечињата во установата. Деновиве се врши генерално чистење и темелна дезинфекција на сите пет објекти на градинката, информира директорката Мери Рилкова.

„ Почнувајќи од минатата недела во сите објекти спроведуваме темелно  генерално чистење  Се врши темелно чистење на занимални, помошни простории, на кујна, на играчките, дидактичкиот материјал во занималните. “- Рилкова,  директор на ЈОУДГ Јасна Ристеска, Охрид.

До крајот на неделава ќе завршат активностите за дезинфекција и чистење, а подготвени сме и во поглед на заштитни средства за вработените , вели Рилкова. За упис на нови дечиња директорката  вели дека родителите може да испраќаат барања по електронски пат а во однос на приемот и бројот на децата во групите ќе  постапуваат според  протоколите кои ги очекуваат.

„ Групите и досега беа нешто над нормативите по бројот на деца но работевме во нормални услови а сега со вонредната ситуација и дополнителните протоколи чекаме насоки од министерството за здравство и министерството за труд и социјална политика и ќе ги адаптираме групите согласно она што ќе го добиеме како насоки и протоколи. “– вели Рилкова.

Денеска први на скринингот на граѓани за COVID-19  ќе бидат вработените во градинките, односно околу 2.000 лица во државава. Од охридската градинка  сé уште немаат официјално известување кога ќе биде спроведен скринингот на нивните вработени, околу 140 воспитувачи, негователи и помошен персонал во петте објекти. Здарвствените власти очекуваат скринингот да биде завршен за период од една недела и градинките да се вратат во функција според предлог планот за олабавување на мерките за спречување на ширењето на коронавирусот.