116 години од Илинденското востание и 75 години од Првото заседание на АСНОМ

Денеска се навршуваат 116 години од Илинденското востание и 75 години од Првото заседание на АСНОМ што се одржа во манастирот Прохор Пчињски, на кое беа поставени темелите на современата македонска држава.

Овие два датуми се длабоко врежани во колективната меморија на нашиот народ. Двата Илиндена претставуваат историски темелник на македонската самобитност, непокор и слобода.

Годишнините од Илинден и АСНОМ ќе бидат одбележани со народни собири и свечености во Скопје, Пелинце и Крушево, каде оваа година ќе се одржи централната манифестација.

Празникот свечено ќе биде одбележан и во Охрид. Свеченостите почнаа синоќа во Велгошти, со положување свежо цвеќе пред спомен обележјето на Илинденците и пригодна културно уметничка програма.

Утрово ќе биде положено свежо цвеќе пред спомен обележјето на Илинденците во градскиот парк во Охрид, а во 11 часот во село Плаќе предвиден е историски час.