Одбележани 100 години од првата улична светилка во Охрид

Во организација на Лајонс клубот „Лихнидос“ од Охрид, одбележана 100 – годишнината од поставувањето на првата електрична светилка во Охрид од страна на тогашната Австриска војска. Синоќа на градското пристаниште беше откриено пригодно обележје, а д-р Никола Митровиќ од Историскиот архив во Охрид одржа краток историски час.

„Токму денес во градот Охрид се случува еден настан од таканарешената урбана историја на Охрид. Нејзиниот историјат е доста интересен . Во првата светска војна австриските војски кои биле стационирани во Охрид во една фабрика во којашто всушност ги репарирале своите оружја електричните погони ги користеле навечер за осветлување и така се создале неколку канделабри со електрично напојување“ рече  Никола Митровиќ – историчар архивист.

Зоран Тунтев – член на ЛК „Лихнидос“ објасни дека идејата за овој чин ја добил барајќи фотографии за пригодна изложба по повод 8-ми Декември (Св. Климент, Патрон на градот), и наишол на податок дека пред точно 100 години, 1916 година на градското пристаниште е подигнат првиот електричен фенер во Охрид, од страна на Австриската војска за што постои и фотографија. Тоа и била инспирацијата за  Лајонс клубот Лихнидос дас епокрене иницијатива на истото место да се подигне фенер и адекватно да се означи со пригодна плоча на македонски и германски јазик.

„Ова јас го набљудувам и од аспект на развојот на туризмот кога сега ќе дојдат австриски и германски туристи ќе најдат плоча напишана на Германски јазик и ќе видат луѓето дека негуваме некаква традиција и заедничка историја и од тој аспект веруам дека туризмот најдобро се продава кога имате добра приказна“ објасни  Зоран Тунтев – член на ЛК „Лихнидос“.

На церемонијата на откривањето на обележјето присуствуваше и амбасадорката на Австрија во Република Македонија Ренате Коблер.

„Пред сто години од практична примена донесено е светло во светиот град Охрид, и луѓето можеле да прошетаат покрај убавото крајбрежје навечер. Прекрасно е да се биде денес тука повторно и да се прошета покрај оваа светилка“, потенцира  Ренате Коблер – Амбасадор на Австрија во РМ.

На свеченоста покрај амбасадорката присуствуваше и претседателот на Управниот одбор на ЕВН Македонија Штефан Петер, претставници на локалната самоуправа и други официјални лица и гости.