Седумдесет години борба за светлина

Седумдесет години борба за светлина. Националниот Сојуз на слепи на Мекдонија одбележува голем јубилеј, 70 години од своето основање и активна работа. Националниот сојуз на слепите на Република Македонија е формиран во далечната 1946 година под називот Сојуз на слепите на Република Македонија и оттогаш до денес дејствува како национална, невладина, непартиска, непрофитна и хуманитарна организација од посебно општествено значење во Републиката. Основна мисија на Сојузот е создавање на подобри услови за живот и работа на слепите лица ширум републиката, нивните здруженија и нивната подобра социјализација и интеграција во општествената заедница, објаснува Славчо Џајкоски, – претседател на Здружението на слепи лица од Охрид.

„Сакаме во текот на нивниот живот да ги вклопиме во општеството да постанат рамноправни граѓани, како и сите други, да се покажат на сите полиња, да придонесат за ова наше општество за нашата држава и нормално да можат самостојно да живеаат и делуваат во својот секојдневен живот“ објаснува Џајкоски.

Еден од централните настани со кои ќе се одбележи овој јубилеј е и големиот Меѓународен јубилеен концерт на слепи музичари кој оваа сабота ќе се одржи во Охрид. Концертот ќе се одржи на 24-ти септември, сабота во Дом на култура „Григор Прличев“, со почеток во 19: 30 часот, а публиката ќе има можност да ужива во изведбите на навистина врвни музичари од регионов.

„Ќе настапат музичари од балканските земји, Бугарија, Србија, Црна Гора, Албанија и Косово и нормално ние како домаќини, нашите членови од Македонија. КУД „Биљана“ од Скопје и КУД „Караѓуле“ од Битола. Еден апел до сите наши сограѓани масовно да присуствуваат, влезот е слободен бидејќи важно е уметниците да имаат масовна публика, а нашите сограѓани ќе се увидат во можностите од слепите лица“ вели Џајкоски.

Централната прослава ќе биде на 15-ти октомври, по повод Светскиот ден на слепите лица и ќе се одржи во Скопје. Џајксоки вели дека за поздравување соработката помеѓу општинските организиации и со останатите невладини органзиации и здруженија. Финансиите остануваат горлив проблем во функционирањето на здруженијата, но Џајкоски се надева дека со интензивна соработка со државните институции на национално и локално ниво, истиот ќе биде надминат.