Доживотен затвор за првообвинетиот во случајот „Император“

Прогласени за виновни обвинетите во судскиот процес за двојното убиство што во август минатата година се случи во хотелот „Император“ во Охрид. Ваква е одлуката на Судечкиот совет при Основниот суд во Охрид која беше донесена денеска.
На првообвинетиот Бојан Петрески од Охрид кој се товареше за кривично дело убиство и неовластено поседување на оружје и распрскувачки материјали, судот му изрече единствена казна доживотен затвор. Тој е прогласен за виновен за извршено кривично дело убиство со умисла над 38-годишниот Ромео Ѓузелоски и 56-годишниот Васил Ристески.
Второобвинетиот Ристе Силјаноски од Охрид е прогласен за виновен за помагање на сторител по извршено кривично дело убиство. Нему судот му изрече казна затвор во траење од една година, во која му се пресметува и времето минато во притвор.
Одбраната на осудениот Бојан Петрески, најави дека по добивање на пресудата на писмено, одлуката на Основниот суд во Охрид ќе ја обжали пред апелацискиот суд.