Раскинат договорот помеѓу Општина Охрид и Фибула за продажба на атрактивната локација кај каналот

Општина Охрид во првостепена постапка пред Основен суд Охрид ја доби тужбата против Фибула Травел за раскинување на договорот за продажба на земјиштето на локацијата кај каналот Студенчишта.

Имено, според објавата на судската пресуда од 29.11.2019, судот го усвоил тужбеното барање на општината, со што договорот за оттуѓување на градежно земјиште по пат на електронско наддавање од 19.08.2014год  се раскинува поради неисполнување на истиот од страна на Фибула.

На оваа  атрактивна локација на охридското крајбрежје, компанијата Фибула ер Травел требаше да изгради два хотели од светски бренд. На 4-ти март годинава, по 9 години судски спорови со ГП Трудбеник, започна постапката  за отстранување на објектите и стварите на Трудбеник од локацијата кај каналот Студенчишта.  

Извршниот директор на ГП Трудбеник, Ацо Спироски поздравувајќи ја пресудата на охридскиот суд за раскинување на купопродажниот договор, вели дека ќе  продолжи со законските права да си ја добие назад локацијата.

„ Ние си преземаме дејствија, имаме силни аргументи , одиме по тие насоки, мислиме дека државата и судството ќе ги доведат во ред работите, ќе ја утврдат вистината и ќе ги најдат виновниците кои предизвикаа состојби каде што се открива институционален криминал, коруптивни односи. Јас ја поздравувам одлуката на Основен суд Охрид и мислам дека истата се темели на аргументи.“ – вели Ацо Спироски – Извршен директор на ГП Трудбеник

Правниот застапник на Фибула, Драган Коровешоски за ТВМ вели дека ќе ја обжалат одлуката на Основниот суд Охрид, па дури и дека за целиот случај околу локацијата кај Студенчишки канал ќе бараат меѓународна арбитража.