Македонија со тешкотии ги искористува средствата од светските фондови

Охриѓани се запознаа со можностите за добивање подгрантови во рамки на проектот за локална и регионална конкурентност. Пред објавувањето на вториот повик за доделување на подгрантови за поддршка и развој на туризмот добро е клучните чинители во дестинацијата да се запознаат со концептот, методите и бенефитите од управување со дестинации, а потенцијалните апликанти подетално да се запознаат со специфичните развојни планови, вели Маја Блажев која е ангажирана како специјалист за развој на туризмот во овој проект.

„Нашиот проект и тимот кој што работи на овој проект ги има разработено и олеснето начините и апликациските формулари. Воедно организираме и работилници на кои чекор по чекор се објаснува самиот процес и начинот на пополнување на апликациите така да сите консултанти стојат на располагање и можам да кажам дека процесот преку пректот за локална и регионална конкурентност е доставен и да апелирам на луѓето инволвирани од секторот на туризам да излезат и аплицираат на вториот повик кој ќе биде објавен наскоро“- вели Блажев.

Средствата кои Европскат комисија ги одобрува за унапредување на туризмот се од голема корист сметаат експертите од ФТУ Охрид. Проф Науме Мариноски вели дека една од добрите околности е тоа што сите чинители на туризмот можат да искористат дел од европските средства, нагласувајќи дека, принципиелно мора да бидат утврдени носителите на туристичката политика и економија во определени простори како што е нашиот.

„Прецизно, јасно и недвосмислено најпрво да се определи туристичката дестинација да се дефинира и да се ограничи. На тој начин ние ќе имаме еден систем на дестинации кои ќе можат успешно да се развиваат. Тоа претпоставува глобално унапредување на туризмот во Македонија и парцијално во определени регионални целини или туристички дестинации“ – посочува проф. Мариноски.

Проф. Мариноски предочува дека Македонија досега тешко ги користела европските фондови. Тој очекува дека наскоро тоа ќе се промени и ќе има служби кои директно ќе помагаат во добивање на грантовите.
Проектот е финансиран од страна на Европската унија. Првиот повик за доделување подгрантови кои ќе го подобрат локалниот економски развој на одбраните дестинации е завршен. На него се пријавиле 147 подпроекти од сите градови.