Именувани новите членови на надзорни и управни одбори во охридските претпријатија

На денешната четврта седница на Советот на општина Охрид беа разрешени старите, а именувани беа нови членови на управните и надзорни одбори на јавните претпријатија во Охрид. Мандаот на новите членови е шест месеци, а има редукција, наместо како што беше досегашната практика составот на управните и надзорните одбори да го сочинуваат 7 членови овој пат се избраа по 5. Координаторот на советничката група на СДСМ Константин Георгиевски појаснува дека причина за тоа е економскиот аспект, односно дека со тоа сакаат да ги намалат трошоците на Јавните претпријатија по основ исплата на паушали.

„На сите избрани членови на управните одбори има посакувам успешна работа и апелирам до нив да се редовни на седниците да носат правилни, мудри и издржани одлуки ако работата на Јавните претпријатија би била што попродуктивна и плодна“.

Советниците од ВМРО – ДПМНЕ и коалицијата, како што најавија денеска ја бојкотираа седницата на Совет во знак на револт поради притворањето на осомничените за собраниските настани од 27 април, меѓу кои се и двајцата охридски пратеници. Георгиевски изрази жалење поради тоа што нивните опозициони партнери веднаш по донесувањето на дневниот ред ја напуштиле седницата и смета дека сепак во иднина кај нив ќе надвладее разумот и ќе се вратат на наредната седница.

„Се надевам дека колегите во иднина ќе ја преиспитаат нивната одлука дека ќе постапат конструктивно и разумно и дека активно ќе се вклучат во работата на советот на општина Охрид и ќе ја оправдаат довербата на сите оние гласачи кои што ги поддржале да работат во интерес на Охрид и охриѓани“.

На денешната седница беше донесена и предлог одлуката за надоместокот на трошоците на политичките партии и организаторите на изборните кампањи за Локалните избори.