ВМРО ДПМНЕ започна со прибирање на идеи од охриѓани за престојните парламентарни избори

Од денес па во наредните пет дена охриѓани ќе имаат можност да ги предлагаат своите идеи за подобар Охрид и подобра Македонија, кои идеи треба да бидат инкорпорирани во изборната програма на ВМРО ДПМНЕ за престојните парламентарни избори. На штанд поставен на градскиот плоштад мобилна екипа од млади членови на партијата деновиве ќе ги евидентираат идеите кои охриѓани ќе ги предлагаат. Градоначалникот Никола Бакрачески вели дека токму граѓаните се факторот од кој тие ја црпат енергијата за работа. Според Бакрачески, граѓаните знаат што за нив е најнеопходно и приоритетно и што сакаат да видат како се реализира. Ваквиот начин на градење на изборната програма, според градоначалникот се покажала како успешна во претходните изборни циклуси.

“Во изготвување на нашата програма, за локалните избори во охрид, енергијата односно идеите ги црпевме токму од граѓаните на Охрид, во директна комуникација со нив, и се разбира како и за Охрид, така и за цела Македонија за сите оние идеи кои што се целисходни, за идеи кои што имаат оправдување, идеи кои што се одржливи или кои што се изводливи и кои што може да бидат реализирани секако посебни комисии од страна на ВМРО ДПМНЕ заседаваат, ги разгледуваат и таму каде што сметаме дека треба да бидат прифатени сите тие се инкорпорираат во програмата на ВМРО ДПМНЕ која што ќе им ја понуди на граѓаните на Охрид почнувајќи од 2016та до 2020та година.”-вели градоначалникот на Охрид, Никола Бакрачески. 

Градоначалникот Бакрачески потенцира дека тие во своите програми точно ги дефинираат проектите, со зададени рокови за реализација што според него било препознаено од граѓаните во минатите изборни циклуси.

“Ние сме една сериозна политичка структура која држи до ветеното, која држи до ветениот збор на граѓаните на Охрид како еден повратен фидбек за она што тие го очекуваат од нас и секако дека принципот на отчетност никогаш не сме го одминале туку тоа е една од основните причини за нашето функционирање за кое што и граѓаните ни ја даваат довербата. Секако дека ние не живееме од лажни ветувања, или од креирање на лажни надежи на граѓаните, или нудење на чуда или неостварливи проекти, туку го нудиме она што навистина можеме да го инкорпорираме во програмата и она што навистина може да биде реализирано во стварност, се со цел да го унапреди и подобри живеењето во Република Македонија.”-рече Бакрачески. 

Бакрачески ги повика охриѓани масовно да одговорат на акцијата за прибирање на идеи безразлика дали имаат политичка или идеолошка ориентација, да го посетат штандот на градскиот плоштад и да ги изнесат нивните идеи за тоа како да се унапреди живеењето во Охрид и Македонија.