Нема нова давачка поврзана со фискалните каси

Управата за јавни приходи најостро ги осудува обидите на одредени политички фигури за дезинформирање на бизнис заедницата и граѓаните за наводно воведување на нова јавна давачка поврзана со ГПРС фискалните апарати.

Управата за јавни приходи нема воведено дополнителни давачки, што значи “нула“ прилив во буџетот, а не 12 милиони евра како што се тврди за да се пополнат буџетски дупки. Целта на дезинформациите е очигледна – една од подобрите проекти на даночната администрација со позитивни оценки не само од бизнис заедницата, туку  и од сите релевантни меѓународните организации, се користи за дневно политички препукувања и промоција.

Податоците за наплатата на даночните приходи се јавно достапни, и секој доколку аргументирано дебатира и се разбира од даночни политики не може, а да не види дека процентите на наплата бележат пораст.

Нашата визија и стратешка определба е да ја намалиме сивата економија, да ги намалиме административните трошоци, а токму тоа се ефектите од воведувањето на ГПРС фискализација.

Секој даночен обврзник е запознаен со обврската за сервисирање на фискалниот систем на опрема кај овластен центар, што не е новина што се воведе со ГПРС фискализација.Од друга страна, новина и олеснување кое за даночните обврзници се воведе со измените во Законот за регистрирање на готовински плаќања е обврската на овластениот центар да обезбеди превентивна проверка без надоместок, најмалку еднаш во годината.

Би потенцирале дека трошоците за обезбедување на непречена комуникација и пренос на податоците преку GPRS апаратот и Управата што се одвива преку мрежите на мобилните оператори се движат до 600 денари, а сите други потреби, како што се функционална и техничка поддршка, поправка на фискалниот апарат и сл. се предмет на договор помеѓу овластениот центар и даночниот обврзник.