Во охридско пронајдени гранати од Прва светска војна

Тринаесет артилериски гранати се пронајдени во Лескоец, охридско. До нив дошле работниците на скопската фирма Вардар вчера при вршење ископ за поставување на фекалната канализација во ова село. Тие веднаш прекинале со работа и случајот го пријавиле во полиција.

Љупчо Прескакулов, од Дирекцијата за заштита и спасување вели дека веднаш после укажувањето од охридскиот сектор за внатрешни работи екипи излегле на лице место и ги извршиле сите потребни активности за детектирање и деактивирање на убојните средства. Според него станува збор за неексплодирани  гранати со калибар 105 – 120 милиметри кои датираат од Првата светска војна.

Прескакулов тврди дека гранатите во ниеден момент не претставувале опасност за работниците кои ги пронашле при ископ на канализацијата затоа што истите не биле испукани од цевка туку најверојатно биле оставени од војската во минатото при напуштање на теренот.

Гранатите биле безбедно подигнати од лице местото и биле складирани во магацинот за Неексплодирани Убојни Средства. Истите ќе бидат преземени од пиротехничари на Дирекцијата за заштита и спасување и ќе бидат уништени во Кичево информираат од Дирекцијата за заштита и спасување.

{loadposition content9}