Охридските староградски средби годинава со сребрен јубилеј

Сребрено, јубилејно издание на традиционалниот фестивал на староградска песна, „Охридски староградски средби“. Ова е фестивал кој со години ја негува македонската староградска песна, песна која се создавала во периодот кога во градовите цутело занаетчиството и кога се создавало градското јадро.

Креирана во различни градови, од различни музички тајфи, староградската песна изобилува со варијации карактеристични за местото од кое потекнува.

„Оние стари убави трубадурски песни и градски серенади кои што секој град, секое поднебје си има карактеристика. Токму тоа е поентата на овој фестивал, да го истакнеме од секое место она што е интересно и убаво како музика, како она што останало да се памети во градскиот живот, во градската традиција и токму тоа да продолжиме, да го зачуваме и со постоењето на ваквите фестивали како што е и „Охридски староградски средби“ да го зачуваме, да остане, да продолжи да се негува истата таа традиција.“-вели директорката на Центарот за култура „Григор Прличев“, Драгана Боцеска.

А за да се покаже оваа варијација на староградската песна, и годинава обезбеден е настапот на повеќе групи, хорови, ансамбли и оркестри од целата држава.

„Ќе настапат оваа година хорот при Центарот зџа култура-„Григор Прличев“ од Охрид, градскиот тамбурашки оркестар од Штип,  Културно уметничкото друштво на Здружението на пензионери од Охрид и Дебрца, „Распеани гевгеличани“, „Распеани паланчани“, градскиот хор од Штип, октетот од Прилеп, значи имаме од цела Македонија и специфично  за сите ансамбли е што тие се претставуваат со програма која што е типична за поднебјето од каде што доаѓаат, за градовите кои што ги претставуваат. Инаку овие ансамбли пејат со ентузијазам, со голема љубов, ја негуваат староградската музика и токму живеат за овие фестивали.“-рече Боцеска.

Инаку 25то јубилејно издание на фестивалот „Охридски староградски средби“ ќе се одржи во Сабота на 28ми Септември со почеток во 20 часот, а пред започнувањето на фестивалскиот дел, учесниците ќе го имаат традиционалното дефиле низ градските улици. Влезот е слободен, па повелете на убава староградска песна.

{loadposition content9}