Над 890 уметници на Вевчанско културно лето

Вевчани со забрзани чекори оди кон развој на туризмот. Oпштината културно ќе се издигнува преку организација на ВЕКУЛ, Вевчанското културно лето, кое започна на 14.07 и ќе трае до 08 ми септември годинава. „Ме радува силната поддршка од членството на културната манифестација „Печалбарски денови“ како и на членовите на КУД „Дримкол“ од Вевчани, кои своите програми ги обединија и за прв пат ќе ги презентираат на ВЕКУЛ“, истакана Цветомир Угриноски – градоначалникот на Вевчани.

„Нашата општина Вевчани е прва и единствена од помалите општини во Р. Македонија, која организира ваква автентична манифестација нудејќи им на граѓаните разновидна програма за сите вкусови од сите уметнички области. Јасно и недвосмислено се покажува дека вака здружени и сплотени не само што можеме многу повеќе да дадеме туку и подалеку да стигнеме со брендот Вевчани“.

На Вевчанското културно лето планирано е остварување на 22 програми во кои учество ќе земат 890 уметници од земјава и од странство, најавува градоначалникот Угриноски. Свеченото отварање на манифестацијата беше во неделата, а на тоа претходеше ликовната колонија „Вевчански видувања“, како и промоцијата на романот „Безгрешни копилиња“ на Илија Каланоски.

„Главен настан ќе биде Преображение тоа ќе биде 4 дена почнувајќи од 16 јули до 19 со учество од 12 фолклорни ансамбли од странство, 4 промоции на книги, 4 фолклорни вечери, 2 филмски вечери 2 музички концерти, 3 театарски претстави, 1 ликовна изложба и едно предавање посветено на поделбата на Македонија со Букурешкиот договор“.

Годинешното прво издание на ВЕКУЛ се одржува по повод 3 значајни јубилеи, 670 години од второто споменување на Вевчани во пишан текст, 180 години од работата на вевчанското народно училиште на мајчин македонски јазик и 140 години од осветувањето на црквата „Св. Никола“. Угриноски веќе има визија и за наредната година. Планира државен фестивал на помалите општини по повод 70 години АСНОМ и од ослободувањето на Р. Македонија. Тој е убеден дека вевчанското културно лето ќе допринесе за забрзан развој на туризмот во општината.

{loadposition content9}