Завод и музеј се пофали со сработеното, најави нови, интересни проекти

Националната установа „Завод за заштита на спомениците на културата и музеј-Охрид“ ги презентираше резултатите од својата работа во изминатите 6 години. Периодот од 2006та до 2012 година, се покажал како доста продуктивен за оваа национална установа. Тие успеале да реализираат вкупно 165 проекти за заштита на недвижното културно наследство и 36 проекти за заштита на движното културно наследство.

„Во поглед на недвижното културно наследство, конзервирани и реставрирани се вкупно 9 христијански сакрални објекти, конзевирани и презентирани се над 300 метри квадратни богати мозаично подови, конзервирани се вкупно 6 исламски објекти, сакрални и профани, конзервирани и презентирани се вкупно 4 археолошки локалитети, конзервирани и реставрирани се повеќе метри квадратни од бедемските ѕидови од подградието на Самуиловата тврдина, во делот на комплексоите Горна и Долна порта.“-вели директорката на Националната установа „Завод за заштита на спомениците на културата и музеј-Охрид“, Тања Паскали-Бунташеска.

Само во текот на 2012та година, „Завод и музеј“ ја започнале конзервацијата и презентацијата на археолошкиот локалитет Манчевци, потоа куќата на Бојаџиеви како значаен објект од староградската архитектура, куќата на Ајри Доко, како и ентериерното уредување на зградата на НУ Завод и музеј. За 2013та година, најавија финализирање на неколку проекти.

„Од проектот за санација на фасади, оваа година ќе работиме на конзервацијата на фасадата од куќата на Јонче Стружан, тоа е ресторанот Антико, и мислам дека тоа ќе биде доста атрактивен проект и со куќата на Ајри Доко, ќе се оформи една интересна, карактеристична амбиентална целина, карактеристична за староградската охридска архитектура.“-рече Паскали-Бунташеска.

2013та година, за Завод и музеј, ќе биде особено работна бидејќи воедно ќе работат и на реализација на капиталните проекти, како што е возобновувањето на Светиклиментовиот универзитет на Плаошник, како и конзервацијата на црквата Света Богородица Перивлептос.

Ќе работат и на конзервација на живописите во три цркви во охридско, и тоа црквата Свети Никола во с.Косел, црквата Сите Светии во с.Лешани и Света Богородица Захумска во с.Трпејца.

{loadposition content9}