Две подводни елки ќе го красат Охридското езеро

Не една, туку две подводни елки годинава го красат Охридското езеро. Денес, околу дваесетина нуркачи од нуркачкиот центар „Амфора“, од Сојузот за подводни активности на Македонија, но и нуркачи од соседна Албанија ја одржаа единаесетгодишна традиција на поставување на подводна елка за новогодишните празници.

Годинава, акцентот го ставија на најмладите љубители на нуркањето.

„Чувството е неверојатно и многу убаво си поминавме под вода.“

„По втор пат учествувам и чувството е супер. Желба си замисливме, здравје, среќа, мир во целиот свет.“-рекоа младите нуркачи.

Д-р Горан Балески во улога на подводниот Дедо Мраз, на најмладите им подари и пакетчиња.

„Навистина е една убава традиција. Оваа година акцентот е ставен на младите нуркачи и нас ни е задоволство па еве денеска правиме една предновогодишна забава заедно со клубот за подводни активности, нуркачкиот центар „Амфора“, Сојузот за подводни активности и иста ваква елка се става и во Свети Наум, во изворите кај Свети Наум, така да оваа година ќе има на две места да се видат, во Градиште и Свети Наум.“-вели д-р Горан Балески, подводниот Дедо Мраз.

Претседателот на Сојузот за подводни активности на Македонија, Периклија Бешка смета дека е добро што оваа традиција зема се поголем замав.

„Се гордееме затоа што ние сме први во тоа. Си ја тераме традицијата и сите сме среќни и задоволни затоа што ги гледаме младиве кои не следат во чекор, верувам дека и светот не гледа и сметаме дека иако е традиција, треба и нешто ново да воведеме и се надевам дека наредната година и вас ќе ве изненадиме.“-рече претседателот на Сојузот за подводни активности на Македонија, Периклија Бешка.

Инаку двете подводни елки во Градиште кај Заливот на Коските, и во Свети Наум кај изворите, се поставени на четири метра длабочина и со години наназад претставуваат интересна атракција за сите посетители.

{loadposition content9}