Шумата над кошишта, темпирана бомба

Шумата која се наоѓа на потегот од Горна порта до амбулантата Воска, потенцијална опасност за жителите на Урбаната заедница Кошишта. Мештаните  велат дека особено во летниот период во секој момент би можело да дојде до пожар кој би имал катастрофални последици. Жилески Крсте, жител на оваа месност, инаку шумарски инжинер во пензија, вели дека шумата претставува темпирана бомба. Бидејќи голем дел од стеблата се суви и стари, а има и сува ниска вегетација условите за пожар и негово брзо ширење се идеални, предупредува Жилески.

За овој проблем жителите од Кошишта алармирале уште пред две години. Тие направиле петиција која ја доставиле до Локалната самоуправа, Комуналец, Пртивпожарната единица и до останатите институции кои можат да помогнат во решавањето на истиот, но досега никој ништо нема превземено.

Од Локалната објаснуваат дека причина што досега ништо не е превземено е што кошиштани наместо да достават барање тие само ги известиле за проблемот. Симон Илиевски, портпаролот на Локалната вели дека граѓаните на оваа урбана заедница треба да достават барање до Комисијата за превземање мерки и активности за отстранување дрва на теритирија на Општина Охрид. После тоа нејзините членови треба да излезат на терен и да увидат каква е состојбата, кои дрва треба да се сечат, а кои да се поткастрат и на крај да се превземат соодветни мерки.

Но, да потенцираме дека време за чекање нема. Само да потсетиме дека пред четири дена на овој дел од градот имаше пожар кој за среќа брзо беше локализиран па не дојде до некои поголеми несакани последици.

{loadposition content9}