Музиката во Охрид под контрола

Општинските инспектори работат двосменски во борба против бучавоста. Проблемот е евидентен, но во споредба со изминатите две години драстично е намален, објаснува Танас Танасоски, раководител на општинскиот инспекторат. Тој додава дека инспекторите кои се под негова капа, излегуваат на терен од 22 до 4 часот наутро, за да ги контролираат угостителските објекти и тоа допринело да се намалат проблемите околу бучавоста.

„Но сепак морам да истакнам дека неколку кафичи и понатака не се придржуваат до законските прописи односно бучавата е над онаа нормала која што е предвидена со закон. Кај сите тие кафичи преземени се мерки изречени глоби и во моментов се наплатени, а глобите не се мали“.

Кафулињата во стариот дел од градот и понатаму се на црната листа на прекршители и поголем број од глобите се изречени во тој дел, нагласува Танасоски. Исто така според него, затаила контролата од државните инспекторати, кои пред сезоната биле согласни заеднички и координирано да се приклучат во справување со проблемите од кои трпи туризмот.

„Мислам дека ќе треба, побарано е и од наша страна со помош на другите инспекции ќе мора да се преземат уште поригорозни мерки и да се затворат тие кафичи. Но едноставно немаме баш голема соработка со инспекциските надзори од другите министерства, освен со полицијата“.

Неодамна Локалната самоуправа, поточно градоначалникот Петрески, формира и дополнителна комисија, за справување со  проблемот на бучавоста која ќе мора да ги примени најригорозните мерки, категоричен Танасоски. Тој предвидува дека наредната сезона овој проблем целосно ќе биде надминат. Секако, оваа оптимистичка најава повеќе пати ја слушаме, посебно пред туристичката сезона кога сите надлежни чинители на туризмот набиваат кондиција за справување со проблемот, но практиката зборува поинаку, дека трнлив е патот за надминување на проблемот со бучавоста.

{loadposition content9}