СОС за рибниот фонд

Зелената партија стравува од генетски колапс на ендемичните риби во Охридското Езеро. Во нивна организација и со сосоработка со Риболовното друштво Св. Апостол Петар, тие денес организираа трибина на тема „СОС за рибнинот фонд“. Претседателот на ДОМ од Охрид, Зоран Стрезоски вели, факт е дека се случи помор на плашицата и за сметка на тоа неможе институциите да играат пинг – понг, кој е одговорен. Тој смета дека треба да се детектира која институција затаила со цел да и се укаже, па да се преземат соодветни мерки за надминување на состојбата, како проблемот не би се случил и со пастрмката.
Заменик министерот во МЖСПП, Стево Темелкоски, потенцира дека се дискутира на една сериозна тема, поточно за алармантна состојба со поморот на рибите во Охридското езеро. Неговиот став во врска состојбата е дека вистинскиот пат и ориентација каде што можат да се најдат и најдобри решенија, е конструктивниот дијалог меѓу институциите, невладините организации и граѓанскиот сектор.
На трибината беше присутен Аријан Мероли претставник од албанската влада на билатералениот комитет за заштита на Охридско – Преспанското езеро. Тој рече дека кај нив нема помор на рибите, но дека од албанска страна инспекциите започнале да спроведуваат големи контроли. Како и тоа дека било одлучено да се уништат сите мрежи во Охридското Езеро, бидејќи рибниот фонд бил загрозен, а посебно пастрмката.
Експертите од оваа област укажуваат дека состојбата со рибниот фонд е сериозна и треба да се делува ургентно. А целта на денешната трибина на ДОМ е да понуди идеи и решенија за надминување на проблемот. На трибината присуствуваа претставници на еколошките друштва на Охрид и Струга, спортските риболовци, како и претставници на институции кои се инволвирани во оваа проблематика. Не беа присутни од МЈП „Проаква“, иако како што кажа Стрезоски уредно биле поканети.