Рецензираме пост на Фејсбук во кој се тврди дека Центарот за контрола и превенција на болести во САД, „сега вакцинираните смртни случаи ги брои како невакцинирани“. Во склоп на постот прикачен е текст во којшто се извртуваат фактите околу вакцинацијата и смртните случаи. Се тврди дека најголем број на луѓе умираат после првата доза од вакцината (паушално и неточно е наведен податокот дека дури 80 проценти од смртните случаи се после првата доза до 14-тиот ден), па затоа Центарот за контрола и превенција на болести, решил да ги брои и евидентира вакцинираните со една доза, како воопшто да не се вакцинирани.
Се разбира ова е лага. Вистината е дека човек кој ќе прими една доза вакцина против коронавирусот, не добива инстант имунитет во истата секунда на апликација на вакцината. Имунитетот ниту функционира така, ниту е возможно да функционира така. Тоа од самиот почеток на пандемијата со ковид, е истакнувано од бројни експерти. Така, на пример, пред околу еден месец, професорот на Медицинскиот факултет, доктор Никола Пановски истакна:
Почитувани жители на Македонија, вие кои сте примиле една доза вакцина деновиве или ќе ја примите следниов период, а не сте прележале ковид. Ве молам да не влегувате во објектите во кои власта ви дозволува да влегувате. Вие се уште немате имунитет, не сте заштитени, под голем ризик сте таму да се заразите и потоа да ја ширите заразата. Потврдата не ве штити од зараза, нека не ви дава лажна сигурност. Откога ќе ја примите втората доза и ќе поминат две недели, тогаш може да претпоставиме дека сте заштитени, напиша Пановски на својот профил на Фејсбук.
Повеќе светски влади, во својата официјална комуниикација со граѓаните јасно до знаење им ставаат дека имунитет нема да добијат веднаш, туку после две примени дози. Како пример ќе ја наведеме владата на Австралија која дури и официјално на својата веб-страница пишува:
И вакцината на „Фајзер“ и вакцината на „АстраЗенека“, бараат да се администрирани две дози за да се постигне најдобриот имун одговор. Иако парцијална заштита против ковид-19 може да се создаде 12 дена после првата доза, оваа заштита е краткотрајна. Втората доза го поттикнува организмот да создаде посилен имунитет против Сарс Ков 2, вирус што предизвикува ковид-19. Индивидуите може да не се целосно заштитени до 14 дена после втората доза од „Фајзер“ и „АстраЗенека“ вакцините. Поради ова, вие можете да се заразите во овој меѓупериод меѓу дозите така што треба да продолжите да практикувате мерки на заштита, наведува владата на Австралија.
Во постот што го рецензираме лажно се тврди дека „80 проценти од хоспитализациите и смртните случаи се составени од вакцинирани лица“.
Анализата на Министерството за здравство на Република Северна Македонија го покажува спротивното. Прво и основно, не е точно наведеното во текстот дека вакциниран со една доза е целосно вакциниран. Тоа едноставно не е така никаде во светот и претставува медицински непоткрепено тврдење од причини што имунитетот после една доза е слаб. Во последната анализа на Министерството за здравство за вакцинирани од позитивни случаи со ковид-19, во период од 6 август заклучно со 9 септември годинава, јасно се наведува дека за вакцинирани се сметаат лицата кои се вакцинирани со две дози и поминале најмалку 14 дена од примање на втора доза вакцина.
Во периодот од 6 август до 9 септември годинава, на територијата на државата 26.053 граѓани, се позитивни од тестирани на ковид-19. О нив 19 проценти биле целосно вакцинирани, односно 5.175 лица.Голем е бројот на невакцинирани граѓани кои се заразиле со ковид-19. Според статистика за изминативе пет недели, 20.878 граѓани, односно дури 80 проценти од позитивните на ковид-19 не биле вакцинирани. Процентот на хоспитализирани лица кои се невакцинирани изнесува 84 проценти, додека само 16 проценти од сите моментално хоспитализирани пациенти се целосно вакцинирани, велат од Министерството за здравство.
Министерството за здравство укажува на важноста на вакцинација, секоја вакцина која ја имаме на располагање е безбедна, ја намалува шансата од заболување, спречува тешка форма на болеста и штити од смртен исход. Министерството за здравство апелира граѓаните да се вакцинираат, само така ќе дојдеме до колективен имунитет и ќе спречиме ширење на мутации на Сарс Ков 2, посочуваат оттаму.
Никаде во светот, човек што примил една доза вакцина не се смета за човек кој е целосно вакциниран против ковид. Како невистина го оценуваме тврдењето изнесено во текстот, дека вакцинацијата со една доза треба да се смета за целосна вакцинација. Тоа не може да биде случај зашто на имунолошкиот систем му треба време да функционира и тоа време е оценето од светски експерти 14 дена после втората доза. Бројот на починати после 2 примени дози е низок, не зашто Центарот за контрола и превенција на болести манипулира со броењето, туку зашто после 2 недели после втората доза човекот што се вакцинира има имунитет, а после само една доза, нема задоволително ниво на имунитет.
За ова се апелира уште од почетокот на вакцинацијата во земјава, на пример и од самиот претседател на Комисијата за заштита на населението од заразни болести, доктор Жарко Караџовски. Тој уште на почетокот на вакциналниот процес на прес-конференција рече вакцинираните со една доза да се однесуваат како невакцинирани, зашто немаат имунитет.
Смрт која настапила после првата примена доза вакцина не покажува недостиг на ефективност на вакцината. Не постои ниедна статистика која го потврдува изнесеното во постот, дека 80 проценти од починатите, умираат во меѓупериодот меѓу првата и втората доза.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
