Ниту еден од производителите на вакцини не тврди дека жените после вакцинација треба да почекаат одреден период пред да се обидат да зачнат бебе. Ниту еден официјален извор на информации не препорачува да се чека помеѓу шест месеци и две години пред да се планира бременост, како што дезинформира овој пост на Фејсбук. Такво нешто не е наведено ниту во препораките на Светската здравствена организација (СЗО), ни во препораките на Американскиот центар за контрола и спречување на болести (ЦДЦ). Овој податок не е добиен ниту со некое истражување направено од релевантна медицинска институција. Вакви и слични објави коишто тврдат дека вакцините предизвикуваат стерилитет, се само еден од начините на кои антиваксерските движења се обидуваат, преку лажни информации и со заплашување, да ги убедат граѓаните да не се вакцинираат.
На Фејсбук објава споделена е фотографија од текст во кој без извори и докази се тврди дека не треба да се планира бременост од 6 месеци до две години по вакцинирањето. Ова е неточна информација. Официјалните податоци велат дека придобивките од примање вакцина против ковид-19 ги надминуваат сите познати или потенцијални ризици од вакцинација за време на бременоста и дека нема докази дека вакцините предизвикуваат проблеми со плодноста кај жените или мажите.
Прочитајте тие што планирате бременост….
Ова е нова информација која не ви ја кажуваат и се плашат да ја кажат ?!?!
Значи за сите колку е штетна…
“Метатраксат” да не е штом не смеат да останат бремени?, се вели во постот.
Од сите достапни вакцини кај нас, само производителот на руската вакцина „Спутник“ во упатството за употреба наведува дека таа не се препорачува кај бремени жени и кај доилки, но посочува дека сè уште не се направени испитувања за вакви случаи:
Лекот е контраиндициран за време на бременост и доење, бидејќи неговата ефикасност и безбедност во овие услови не се проучени.
За останатите вакцини нема никакви докази дека се штетни, ниту на процесот на зачнување, ниту дека како било влијаат на плодот или на роденото бебе, доколку мајката која се вакцинирала сè уште дои.
Министерството за здравство од вакцините кои се достапни кај нас, ги препорачува „Фајзер“ и кинеските „Синофарм“ и „Синовак“, кои се безбедни за трудници и доилки.
Ниту еден од производителите на вакцини не тврди дека жените после вакцинација треба да почекаат одреден период пред да се обидат да зачнат бебе. Ниту еден официјален извор на информации не препорачува да се чека помеѓу шест месеци и две години пред да се планира бременост. Такво нешто не е наведено ниту во препораките на Светската здравствена организација (СЗО), ни во препораките на Американскиот центар за контрола и спречување на болести (ЦДЦ). Овој податок не е добиен ниту со некое истражување направено од релевантна медицинска институција.
Напротив, сите официјални институции препорачуваат вакцинација на бремени жени, затоа што компликациите кои може да настанат доколку бремена жена заболи од ковид-19 се далеку поголеми од ризиците од вакцините. Од почетокот на пандемијата сведоци бевме дека неколку родилки ги загубија своите животи поради заразување со коронавирусот.
СЗО препорачува вакцинирање на бремени жени и доилки кои ги класифицира во групата ризични за ковид-19 и не препорачува одложување или прекинување на бременост по вакцинирањето.
Од ЦДЦ препорачуваат во САД да се вакцинираат сите над 12 годишна возраст вклучително и оние кои се бремени, дојат, се обидуваат да забременат сега или може да забременат во иднина. Бремените се со поголема веројатност да се разболат сериозно со ковид-19 во споредба со оние кои не се бремени.
Тешка форма на болести вклучува состојба која бара хоспитализација, интензивна нега, потреба од вентилатор или специјална опрема за дишење или болест што резултира со смрт. Дополнително, бремените лица заболени од ковид-19 се изложени на зголемен ризик од предвремено породување и може да бидат изложени на зголемен ризик од други негативни последици од бременоста, во споредба со бремените жени без ковид-19.
Со слични податоци излезе и Универзитетот Џон Хопкинс од каде тврдат дека нема причина да се одложи планирањето на бременоста по завршување на процесот на вакцинација.
Жените кои се обидуваат да забременат не треба да избегнуваат бременост по вакцинацијата тврдат и од Кралскиот колеџ за акушери и гинеколози од Велика Британија. Оттаму додаваат дека вакцинирањето пред бременоста ќе помогне да се спречи инфекција со ковид-19 и нејзините сериозни последици.
Вака без никакви цврсти докази кои можат да потврдат дека ова е вистинито, се добива впечаток дека оваа информација е измислена и пуштена во етер само за да создава паника и страв меѓу населението, особено помеѓу младите кои во скора иднина планираат проширување на семејството.
Притоа, во објавата вакцината се споредува со лекот „Метатраксат” кој е токсичен и со кој треба да ракува обучен персонал и се користи како лек за повеќе видови малигни тумори, како и ревматоиден артритис.
Според упатството за користење на овој лек, издадено од Министерството за здравство, се вели дека лекот не треба да се дава при бременост и доење и дека три месеци пред планираната бременост и мажот и жената треба да прекинат да го земаат овој лек. Притоа, за време на лекувањето со овој лек треба да се користи контрацепција.
Но, вакво нешто не пишува во упатството за користење на вакцините. Многуте контраиндикации на „Метатраксат“ се наведени јасно и транспарентно во неговото упатство за употреба. Упатство за употреба има секоја од достапните вакцини против ковид-19, но вакви предупредувања не се вклучени, ниту, пак, е вклучена препорака за пролонгирање на бременоста одреден период по вакцинирањето.
Вакви и слични објави коишто тврдат дека вакцините предизвикуваат стерилитет, се само еден од начините на кои антиваксерските движења се обидуваат, преку лажни информации и со заплашување, да ги убедат граѓаните да не се вакцинираат. Затоа немојте да верувате во секакви информации споделени на социјалните мрежи без притоа за тврдењата да бидат понудени цврсти докази од релевантни истражувања и институции.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
