Лекот ивермектин во Австралија е забранет за употреба во третманот на болни од ковид-19. Австралискиот регулатор за лекови им дал изрична забрана на медицинските лица во државата да го препишуваат ивермектин како лек за коронавирусот. Оттука е јасно дека овој лек не се користи во болниците во Австралија. Обвинувањата дека во болниците ивермектин им се дава на вакцинирани пациенти со цел да се покаже дека вакцините се ефикасни, а невакцинираните заболени намерно се ставаат на респиратор, како што се тврди во овој пост, се неосновани и без докази.
Пост на Фејсбук шири дезинформации во врска со третманот на ковид пациентите во Австралија. Постот се повикува на тврдења на Ромео Џорџес, познат како еден од лидерите на протестите против владините мерки за заштита од коронавирусот во Австралија.
МЕДИЦИНСКИТЕ ЛИЦА ВО АВСТРАЛИЈА ВРШАТ УБИСТВО ВРЗ НЕВ@КСИНИРАНОТО НАСЕЛЕНИЕ СО УСКРАТУВАЊЕ НА ЛЕКОТ ШТО Е СПАС, НО САМО ЗА В@КСИНИРАНИ
Во австралиските болници користат ивермектин за васинирани за да изгледа дека в@сината е успешна, а нев@синираните, ги ставаат на респиратор за да страдаат.
Целиот медицински систем е корумпиран до срж, подадена рака што овозможува да се извршат овие злосторства против човештвото!
Тие следат наредби како зомби и не знаат дали се добри или лоши наредби. Повеќе нема морален компас кај овие луѓе кои ги слушаат овие заповеди. Вмешани сте во убиство! Како е кај нас???, пишува во постот што го анализираме.
Постот е придружен со видео од обраќањето на Ромео Џорџес до своите следбеници на Инстаграм, во кое тој изнесува низа обвинувања за лекарите во Австралија. Џорџес тврди дека лекарите во болниците ги третирале вакцинираните болни од ковид со ивермектин, со цел да прикажат дека вакцината е делотворна, а на невакцинираните заболени не им давале ивермектин, туку намерно ги ставале на респиратори. Џорџес алудира на ефикасноста на ивермектинот во третирањето на ковид-19, на тој начин противејќи се на вакцините.
За ваквите тврдења нема никакви докази, ниту факти. Тие не се поддржани од ниту еден лекар во Австралија или кое било официјално медицинско лице. Тоа и ја отвора дилемата дали изнесените тврдења се воопшто точни, или како што пишува самиот Џорџес на видеото, „ако не можеме да докажеме, ќе го извртиме“.
Вакви сериозни обвинувања без никаков доказ можат во голема мера да нанесат огромна штета на медицинскиот кадар низ целиот свет кој неуморно се бори со пандемијата и третирањето на заболените пациенти од ковид-19.
Австралија го забрани ивермектин како лек за ковид-19
Националниот недостиг и десеткратното зголемување на Австралијците што увезувале ивермектин во август, предизвика предупредување од Администрација за терапевтски производи (Therapeutic Goods Administration – ТГА) против употребата на лекот како третман за ковид-19, кој обично се користи за отстранување на глисти кај добитокот, пишува австралиски „Гардијан“.
Во период кога од САД пристигнуваат се поголем број извештаи за труење на луѓето кои на своја рака се лекувале со ивермектин со цел лекување на ковид-19, портпаролот на ТГА за „Гардијан“ изјавил дека е забележано масовно зголемување на бројот на луѓе кои го внесуваат лекот во Австралија.
Во услови на зголемување на бројот на случаи со ковид-19 што се уште расте во Нов Јужен Велс, во август имаше недостаток на локално снабдување со ивермектин, лек кој е одобрен за употреба кај луѓе за лекување на проблеми како што се речно слепило и глисти, објави ТГА, пренесува „Гардијан“.
Загриженоста за зголемениот увоз доведе до тоа ТГА на почетокот на септември да издаде јавна изјава против луѓето што го користат лекот за третман на ковид-19.
Ивермектин е лек на рецепт кој не е одобрен во Австралија (или во други земји на ОЕЦД) за спречување или лекување на болеста ковид-19 и не треба да се увезува за оваа индикација. ТГА силно обесхрабрува самолекување и самодозирање со ивермектин за ковид-19, бидејќи може да биде опасно за вашето здравје. Нема доволно докази за да се потврди употребата на ивермектин кај пациенти со Ковид-19, рече регулаторот.
На 10 септември, австралискиот регулатор за лекови им забрани на медицинските лекари да го препишуваат антипаразитскиот лек ивермектин за употреба надвор од препишаното, како на пример за лекување на ковид-19.
Овој потег дојде откако рецептите за лекот се зголемиле меѓу три и четирипати во Австралија во последните месеци. ТГА ја објави забраната, постапувајќи по совет од Советодавниот комитет за распоред на лекови.
Луѓето сега ќе можат да добијат рецепт за ивермектин за состојби одобрени од ТГА, вклучувајќи шуга и одредени паразитски инфекции, пишува австралиски „Гардијан“.
Ивермектин не е одобрен како лек за ковид-19
Откако австралиски научници во јуни 2020 во стручниот магазин „Антивирал рисрч“ објавија извештај дека со примена на ивермектин во претклиничка, ин витро студија, што значи во лабораториски услови, е постигнато значително редуцирање на коронавирусот САРС-КоВ-2, во земји ширум светот започна вистинска хистерија по лекот.
Ивермектинот во суштина се користи за третман на паразитни заболувања кај животни и кај луѓето, тој е евтин и се продава слободно, без рецепт. Се применува, на пример, против шуга или болести предизвикани од паразити. Тој дејствува врз хлоридните канали на тој начин што предизвикува парализирање или смрт на паразитите.
Светската здравствена организација (СЗО) и Американската служба за лекови (ФДА) не советуваат примена на ивермектин за лекување на ковид-19, предупредувајќи од нуспојави. Потребни се натамошни испитувања заради докажување дали ивермектинот може да биде соодветен како превентивно или средство за лекување од коронавирус, гласи нивниот став.
Тековните докази за употреба на ивермектин за лекување на пациенти со ковид-19 се неубедливи. Се додека не се достапни повеќе податоци, СЗО препорачува лекот да се користи само во рамките на клиничките испитувања. Оваа препорака, која се однесува на пациенти со ковид-19 во било која фаза од болеста, сега е дел од упатствата на СЗО за третман на ковид-19, стои на официјалната страница на СЗО.
ФДА не го одобрила ивермектинот за употреба во превенција или лекување на ковид-19 кај луѓе или животни.
Ивермектин е одобрен за човечка употреба за лекување на инфекции предизвикани од некои паразитски црви и вошки на главата и состојби на кожата како розацеа. Моментално достапните податоци не покажуваат дека ивермектин е ефикасен против ковид-19. Во тек се клинички испитувања за проценка на таблетите ивермектин за превенција или третман на ковид-19 кај луѓе. Земањето големи дози на ивермектин е опасно, предупредува ФДА.
Од сето ова можеме да заклучиме дека ивермектин не е одобрен како лек за третирање на ковид-19 кај луѓето и неговата примена за таа цел е во фаза на клинички испитувања. Прекумерното дозирање на овој лек на своја рака е штетно по здравјето на луѓето. Лекот ивермектин во Австралија, исто така, е забранет за употреба во третманот на болни од ковид-19. Австралискиот регулатор за лекови им дал изрична забрана на медицинските лица во државата да го препишуваат ивермектин како лек за коронавирусот. Оттука е јасно дека овој лек не се користи во болниците во Австралија. Обвинувањата дека во болниците ивермектин им се дава на вакцинирани пациенти со цел да се покаже дека вакцините се ефикасни, а невакцинираните заболени намерно се ставаат на респиратор, како што се посочува во постот кој го анализираме, се неосновани и без докази.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
