Постот што го анализираме шири лаги во врска со сузбивањето на пандемијата на коронавирус во Јапонија и мерките за борба против истата. Не е точно дека Јапонија „става крај на лудилото со ковид-19“, така што ја напушта вакцинацијата и почнува со примена на ивермектин. Во Јапонија се спроведува масовна вакцинација на населението, а ивермектинот не е одобрен како лек во борбата против ковид-19, ниту од СЗО, ниту пак, од јапонските власти.
Пост на Фејсбук шири дезинформации дека Јапонија го прекинала вакцинирањето против ковид-19 и преминала на лекување со ивермектин. Ова не е точно.
Јапонија напушта со вакцинирањето и воведува Ивермектин – става крај на КОВИД лудилото, се вели во фејсбук објавата која ја анализираме.
Јапонија, откако го постигна пикот на заразата во август, кога дневно имаше повеќе од 20 илјади случаи на новозаболени, сега во ноември, бележи драстично намалени бројки на заразени. Така на пример, на 21 ноември, пријавени се 143 нови случаи на заразени и 5 случаи на починати од ковид-19, покажуваат податоците на Worldometers. Ако во август просекот на активни случаи беше околу 230 илјади, сега во ноември се забележуваат околу 1.200 активни случаи на заболени.
Поради ваквите бројки и драстичното намалување на случаите на заразени со ковид-19, на социјалните мрежи почнаа да се плетат приказни дека Јапонија ваквите резултати ги постигнала благодарение на тоа што го напуштила вакцинирањето и почнала со масовна примена на ивермектин. Постот што го анализираме, исто така, ја шири оваа теорија. Но, нашата проверка покажа дека тврдењата изнесени во него, не се точни.
Јапонија го нема регистрирано ивермектинот како лек против ковид-19 и нема престанато со вакцинација.
Како што покажуваат податоците на Our world in data, во Јапонија досега (состојба со 21.11.2021) против ковид-19 целосно се вакцинирале 76,54 отсто од населението, а 2,43 отсто примиле една доза вакцина. На 18 ноември (денот кога е објавен постот што го рецензираме), Јапонија администрирала 258,315 дози вакцини.
Извор: ourworldindata.org
Во Јапонија се одобрени вакцините на „Модерна“, „Фајзер“ и „АстраЗенека“.
Како што неодамна јави „Асошиејтед прес“, дневните случаи на ковид-19 во Јапонија веројатно се намалиле поради кампањата за вакцинација, носењето маски и малиот број луѓе во забавните области во центарот на градот.
Некои можни фактори за успехот на Јапонија вклучуваат задоцнета, но извонредно брза кампања за вакцинација, празнењето на многу области познати по ноќниот живот, бидејќи стравувањата се раширија за време на неодамнешниот пораст на случаи, широко распространета практика, многу пред пандемијата, на носење маски и лошото време кон крајот на август, што ги држеше луѓето дома, напиша „Асошиејтед прес“.
Што се однесува до ивермектинот, Јапонија го нема одобрено овој лек како лек против ковид-19, односно не е наведен како одобрен третман за вирусот од страна на јапонската Агенција за фармацевтски и медицински уреди, владина организација задолжена за преглед на лекови и медицински помагала.
Неточните тврдења дека Јапонија го одобрила ивермектин за лекување на ковид-19 почнаа да циркулираат на интернет откако Харуо Озаки, претседател на Медицинската асоцијација во Токио, го препорача лекот за пациентите со ковид за време на прес-конференција на 13 август.
Медицинската група и Озаки не се поврзани со јапонската влада, а членовите на организацијата можат само да даваат предлози, оценуваат независните организации за проверка на факти.
Понатаму, градските власти на Токио на својата страница посочуваат дека:
Во моментов нема антивирусни лекови за кои се знае дека се ефикасни против болеста коронавирус.
Слично на тоа, Светската здравствена организација предупредува да не се користи „ивермектин“ за лекување на ковид-19 и вели дека лекот треба „да се користи само во рамките на клиничките испитувања“.
Од сето ова можеме да заклучиме дека постот што го анализираме шири лаги во врска со сузбивањето на пандемијата на коронавирус во Јапонија и мерките за борба против истата. Не е точно дека Јапонија става крај на лудилото со ковид-19, така што ја напушта вакцинацијата и почнува со примена на ивермектин. Во Јапонија се спроведува масовна вакцинација на населението, а ивермектинот не е одобрен како лек во борбата против ковид-19, ниту од СЗО, ниту пак, од јапонските власти. Оттука, постот го оценуваме како невистинит.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
