Постот што го анализираме ја шири светски познатата теорија на заговор за „кемтрејлс“. Но, уште пред пет години група од 77 научници, откако ги прегледаа наводните докази дека некои авиони нè прскаат со хемиски супстанци, објавија извештај дека не нашле докази за „тајна атмосферска програма од големи размери“. Белата патека, пак, што ја оставаат авионите во воздухот се нарекува „контрејл“, односно патека од кондензација. Исто така, ковид-19 постои и е реален, а тоа го потврдуваат секојдневните бројки на заболени луѓе и починати од вирусот. Вирусот беше идентификуван од кинеските власти на 7 јануари 2020 година, по што беше изолиран и неговиот генетски материјал РНК.
Пост на Фејсбук шири теории на заговор дека пандемијата со коронавирусот е лажна и дека луѓето, всушност, биле труени со „проектот за кемтрејл“. Ова не е точно.
Постаро видео кое претставува мини доказ како во пракса се одвива труењето и спроведување на проектот за Кемтрејл за депопулација, тромбоза, респираторни заболувања, стерилизација и сл.
Пландемија 2019 -> виrус -> недостаток на кислород -> тешко дишење -> брз умор -> губење на мирис и вкус -> воспаленија на плучата -> згрутчување на крвта.
Кемтрејл -> труење со отрови, тешки метали, хемикалии -> недостаток на кислород -> тешко дишење -> брз умор -> губење на мирис и вкус -> воспаленија на плучата -> згрутчување на крвта.
Заклучок:
Ако вирус неможе да направи згрутчување на крвта и губење на мирис и вкус, тогаш останува нешто друго. �
Отрови не се пренесуват.
Маска не штити од Кемтрејл, се вели во објавата.
Објавата е придружена со видео на кое се гледаат бели траги на небото кои ги оставаат авиони.
„Кемтрејл“ – израз за светски познатата теорија на заговор
Терминот „кемтрејл“ се користи за светски проширената теорија на заговор дека со авионите, „нè прскаат“ со хемикалии. Оваа теорија на заговор особено се засили и доби на актуелност со појавата на пандемијата со коронавирусот, а нејзините поддржувачи шират лаги дека вирусот не постои и дека, всушност, некој не труе со отрови кои предизвикуваат згрутчување на крвта, губење на вкус и мирис, воспаление на белите дробови и т.н., симптоми кои се карактеристични за ковид-19. Според теоријата на заговор за „кемтрејл“ патеките, односно белите траги, кои ги создаваат авионите во воздухот се „хемиски патеки“, наводно се составени од хемиски или биолошки агенси за „злобни цели“.
Ваквите тврдења се категорично отфрлени од научната заедница. Нема никакви докази дека наводните хемиски патеки се нешто различно од нормалните, вообичаени траги од вода кои ги оставаат авионите кои летаат на голема височина под одредени атмосферски услови.
Уште пред пет години (ноември 2016) Група од 77 научници објавија извештај откако ги прегледаа наводните докази дека некои авиони нè прскаат со хемиски супстанци. Од тие 77 научници, 76 изјавија дека не нашле докази за „тајна атмосферска програма од големи размери“. Со други зборови, доказите укажуваат на тоа дека патеките се очекуваниот резултат на авионите што летаат во воздухот.
Што се однесува до „кемтрејлс“ конспиративните теории, истите досега се повеќепати разоткриени од проверувачите на факти, меѓу кои, чешкиот сервис за проверка на факти, Manipulatori.cz., српскиот сервис Istinomer.rs , како и во повеќе рецензии на „Вистиномер“.
Белата патека од авионите е кондензација
Белата патека што ја оставаат авионите во воздухот се нарекува „контрејл“, односно патека од кондензација. Облаците во форма на линија се произведени од издувните гасови на моторот на авионот и настануваат поради промени во притисокот на воздухот, обично на авиони кои летаат на височина неколку километри над површината на Земјата. Патеките се составени од вода, во форма на кристали од мраз. Во зависност од температурата и влажноста на воздухот, тие можат да бидат видливи само неколку секунди или минути, или може да опстојуваат со часови и да се шират на неколку километри.
Пандемијата и коронавирусот се реалност
Што се однесува до тврдењето во постот дека пандемијата со коронавирусот е измислена и дека луѓето, всушност, не заболуваат од вирус, туку од отровите со кои нè прскаат, ќе кажеме дека е една голема лага. Ковид-19 постои и е реален, а тоа го потврдуваат секојдневните бројки на заболени луѓе и починати од вирусот.
Вирусот беше идентификуван од кинеските власти на 7 јануари 2020 година, по што неговиот генетски материјал РНК, беше изолиран. Самата Светска здравствена организација (СЗО) потврдува дека вирусот е изолиран на 7 јануари 2020 година.
Вирусот мутира, а моментално во земјите ширум светот е доминатна варијацијата на делта сојот, којшто е присутен и кај нас. Овој сој го донесе четвртиот бран на пандемијата во Македонија за време на кој се регистрирани нови бројки на заразени и починати лица. На удар на вирусот сè повеќе се и младите луѓе, поради што Министерството за здравство апелираше граѓаните што помасовно да се вакцинираат.
Тврдењето дека вирус не може да предизвика тешкотии при дишење, болки во белите дробови, губење на мирис и вкус, како и згрутчување на крвта, се, исто така, лажни. Токму овие симптоми се карактеристични за коронавирусот.
Од сето ова можеме да заклучиме дека постот што го анализираме ја шири светски познатата теорија на заговор за „кемтрејлс“. Но, не е вистина дека авиони нè прскаат со опасни хемиски супстаци и луѓето заболуваат од коронавирус, а не од наводните „отрови кои паѓаат од небото“.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
