Не е точно дека директорот на „Фајзер“, Алберт Бурла, сега во ноември откажал службено патување во Израел, зашто не бил вакциниран. Вистината е дека Бурла на почетокот март морал да го откаже патувањето за Израел, бидејќи тогаш не бил целосно вакциниран. Во тоа време имал примено само прва доза од „Фајзер“ вакцината, а на 10 март ја примил и втората доза и тоа јавно го објавил пред медиумите и светската јавност.
Рецензираме пост на Фејсбук во кој се тврди дека директорот на „Фајзер“, Алберт Бурла, не е вакциниран. Ова се доведува во корелација со фактот што компанијата каде тој е директор, е фармацевтски гигант и производител на вакцина против ковид-19.
Шефот на „Фајзер“ вели дека луѓето кои шират дезинформации за вакцините против ковид се „криминалци“. А самиот не е вакцниниран и мораше патувањето до Израел да го откаже оти не е вакцниран, се тврди во постот што го рецензираме, а во кој е линкуван следиот напис.
Но, Алберт Бурла е вакциниран со две дози уште на 10 март 2021 година. Информацијата дека Бурла морал да откаже службено патување во Израел, е точна, ама не е точно дека тоа се случило сега, туку се случило на почетокот на вакциналната кампања, кога немаше доволно произведени дози за сите, па имаше приоритетна листа за вакцинирање против ковид. Директорот на „Фајзер“, не сакал да влезе преку ред во таа листа, пред да се вакцинираат здравствените работници кои беа најкритични, бидејќи работат во ковид одделенија со пациенти заболени од ковид. Во моментот кога израелските медиуми објавија дека Бурла ја одложил посетата за Израел, тој веќе ја имал примено првата доза, но ја немал примено втората доза од вакцината.
На 10 март, само три дена по откажувањето на посетата на Израел, Бурла објави на Твитер фотографија дека ја прима втората доза од вакцината.
Возбуден сум да ја примам втората доза од „Фајзер“ вакцината. За своите сакани и за луѓето ширум светот нема нешто што повеќе го посакувам отколку да го сторат истото. Иако патешествието е далеку од завршено, неуморно работиме да го победиме вирусот, напиша директорот на Фајзер на Твитер.
Со оглед на тоа што рецензираниот пост е објавен во ноември 2021 година, кога авторката на истиот, всушност, тврди дека директорот на „Фајзер“ е невакциниран, оценуваме дека постот е невистинит. Дури и во март месец, кога Бурла морал да го откаже патувањето за Израел, зашто не бил целосно вакциниран, тој, сепак, имал примено прва доза од „Фајзер“ вакцината. На 10 март 2021 ја примил и втората доза и тоа јавно го објавил пред медиумите и светската јавност. Оттаму, не е точна интерпретацијата дадена во постот дека директорот на фармацевтскиот гигант, одбива да ја прими вакцината што ја произведува неговата компанија. Тоа едноставно е невистина и Алберт Бурла меѓу првите и релативно рано во вакциналната кампања е целосно вакциниран со две дози.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
