Од само една болница во Велика Британија и состојбата со хоспитализациите во еден ден, не може да се извлече заклучок дека вакцината шири вирус. Во државата 37.650.239 луѓе примиле трета доза вакцина. Британските здравствени власти во своите извештаи наведуваат дека бустерот на Фајзер кај постари од 50 години е ефикасен против хоспитализација кај 98,8 отсто од луѓето кои претходно примиле две дози АстраЗенека или Фајзер.
Рецензираме пост споделен на социјалната мрежа Фејсбук во кој се тврди дека вакцините против ковид 19 „шират вирус“. Ова тврдење е изведено како заклучок, откако е споделено писмо од болница во Англија во кое се вели дека од сите кои биле хоспитализирани во оваа болница на 18 јануари 2022 година, вкупно 182 на број, 162 примиле две или повеќе дози вакцина (од кои 130 биле вакцинирани со три дози), 7 примиле една вакцина, а 13 не биле вакцинирани.
Поради оваа статистика, од само еден ден и од само една болница, во објавата се заклучува дека ,,вакцината шири вирус” и се додава:
Според оваа писмо од болница, од 162 пациенти – 139 примале 3-та вакцина? (ВАКЦИНАТА ШИРИ ВИРУС). И тие сакаат децата да ги вакцинираат?
Од писмото може да се види дека 130 луѓе примиле трета доза, а не 139 како што пишува во постот. Понатаму, не е вистинито дека вакцината шири вирус. На официјалната страница на Министерството за здравство за вакцинација во Северна Македонија, во делот за разобличување митови, пишува дека вакцината не може да ве разболи од ковид-19:
Вакцината не содржи никаков жив или активен дел од вирусот КОВИД-19. Нема да предизвика позитивен тест со кој се тестира активна инфекција со КОВИД-19. Некои луѓе кои примиле вакцина пријавиле лесни до умерени несакани ефекти, вклучувајќи болка на местото на инјектирање, замор, главоболка и болка во мускулите. Не секој добива несакани ефекти. Но, ако добие, тие се нормални и знак дека вашето тело ја гради својата одбрана од вирусот, наведено е таму.
Исто така, од само една болница во Велика Британија и состојбата со хоспитализациите во еден ден, не може да се извлече заклучок дека вакцината шири вирус. Во Велика Британија до 10 февруари 2022 година 37,650,239 луѓе примиле бустер доза односно трета доза вакцина.
Во Велика Британија, здравствените власти во своите извештаи наведуваат дека бустерот на Фајзер кај постари од 50 години е ефективен против хоспитализација кај 98.8 проценти кај луѓето што претходно примиле две дози АстраЗенека или Фајзер (страница 9).
Повеќе студии потврдиле дека вакцините се ефикасни против хоспитализација кај повозрасната популација ако се работи за алфа варијантата, а имаат 90 проценти заштита против делта варијантата со три примени дози вакцини. Кај повеќето групи оваа заштита против хоспитализација опаѓа ако поминале повеќе од 5 месеци по втората доза, особено ако се работи за ризични групи (страница 8 во извештајот).
На страница 13 и 14 во извештајот се кажува дека било направено истражување во кое е утврдено дека ефикасноста на вакцината е пониска за омикрон споредено со делта варијантата на ковид-19. Од тие што примиле две дози АстраЗенека ефикасноста се намалила за половина, до никаков ефект 20 недели по втората доза. Од тие што примиле две дози Модерна или Фајзер, ефикасноста се намалила на 10 проценти 20 недели по втората доза. Две до четири недели после бустерот, ефикасноста на вакцината е од 65 до 75 проценти, а се намалила на 55 проценти девет недели по бустерот. Ако поминале повеќе од десет недели од бустерот, ефикасноста се намалила на 50 проценти.
Меѓу 3 и 30 јануари 2022 година во Северна Ирска, 39 проценти од хоспитализираните под 50 години биле невакцинирани. 14 проценти од тие со ковид-19 над 50 години биле невакцинирани. Невакцинираните повозрасни од 50 години кога ќе се споредат со оние кои примиле бустер доза, имаат 5.2 пати поголеми шанси да завршат хоспитализирани поради ковид-19, се вели во извештајот. За помлади од 50 години, невакцинираните имаат 6.8 пати повеќе шанси да бидат хоспитализирани отколку целосно вакцинираните со бустер, пишува во извештајот за вакциналниот статус на ковид хоспитализираните во Северна Ирска.
Во извештајот е додадена и една клучна забелешка:
Кога има голем опфат со вакцини кај населението, дури и кај високоефективна вакцина, се очекува дека голем дел од случаите на хоспитализација и смртност ќе се случат кај вакцинираните луѓе. Ова е едноставно, зошто поголем дел од населението е вакцинирано, отколку невакцинирано, a ниедна вакцина не е 100 проценти ефикасна. Ова особено е така, зошто приоритетно вакцинирани се луѓе кои имаат поголем ризик од сериозна болест. Луѓето од ризичните групи можат исто така да имаат и поголем ризик од смрт поради причини кои не се ковид-19 и поради тоа може да се хоспитализирани или да починат со ковид-19, а не поради ковид-19. Затоа треба многу внимателно да се интерпретират бројките за хоспитализации, пишува во овој извештај.
Оттаму, не е вакцината таа која што шири вирус, ниту пак придонесува за хоспитализации, како што невистинито се тврди во постот што го рецензираме, туку е природно во општества како британското каде што огромен дел од населението е вакцинирано со трета доза и поголем дел од хоспитализираните да бидат со трета доза. И самите британски власти во официјални здравствени извештаи предупредуваат на внимателно интерпретирање на резултатите од хоспитализациите на вакцинираните, потенцирајќи дека хоспитализацијата може да не била поради ковид-19, туку поради друга болест, особено зашто поголем дел од старите луѓе се вакцинирани, а имаат хронични болести.
Затоа, оценуваме дека не е вистина дека „вакцината шири вирус“.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
