Во постот што го рецензираме, изнесени се купишта дезинформации, како таа за ПЦР тестот, но и тврдењето дека политичарите лажно се вакцинирале. На теоретичарите на заговори дури и со камера им беше вршен директен пренос од вакцинацијата на политичарите, но и тоа не им е доволно да поверуваат дека политичарите навистина примија вакцина. Неточно е и изнесеното во постот дека вакцината не е испитана. Целата теорија на заговор за „непостоечката пландемија“, се врши и врз грбот на медиумите, кои во текот на пандемијата известуваа секојдневно од многу ризични локации, како болници, ковид одделенија, црвени зони, гранични премини каде што во снег беа примопредавани донирани вакцини од Србија.
Рецензираме пост на Фејсбук во кој со наратив на конспирација од типот -,,сите против граѓаните”, при што се конструира лажна слика за пандемијата со коронавирусот. Најпрво, во постот пандемијата се нарекува ,,пландемија”, веќе познат и широко распространет термин кој го користат антивакциналните движења, кои го шират наративот на некаков крајно непрецизен ,,план” за да се затворат граѓаните, да им се одземат слободите, да се контролираат, но и да се измамат за да веруваат во непостоечка пандемија.
Зборувајќи за ПЦР тестот, авторот на постот вели:
Нормално веднаш видовме дека тој тест знае да биде позитивен на сѐ, само не на некаква нова болест, на кози, папаја, кока кола и други предмети во домаќинството, но медиумите и главните протагонисти за спас на човештвото останаа глуви за тој факт.
Но, вистината е дека ПЦР тестот е златен стандард и детектира коронавирус и ниеден друг вирус. Како што „Вистиномер“ и претходно пишуваше, ПЦР тестот не е наменет за во него да се тестираат примероци од храна и пијалоци, туку примероци од нос и од грло. Материјал од храна и пијалоци тестиран на ПЦР тест, не покажува позитивитет на ковид како што манипулира овој пост, ниту пак, значи дека тестот не детектира ковид, туку само значи дека во него се ставени несоодветни материјали, коишто имаат висока ПХ вредност и ја оштетуваат заштитната мембрана на тестот, што пак, ја прави видлива и втората линија и така се манипулира дека храната е ,,позитивна на ковид”, што инаку е бесмислица.
Понатаму во постот се тврди и следното:
Набргу потоа на големо задоволство на истите душегрижници за човештвото, најавената ,,вакцина” за спас од болеста, чудесно се изготви за кратко време, прескокнувајќи секаков вид на тестирање барем на недолжни животни, и беше одобрена за употреба, која дозвола владите од целиот свет едногласно ја прифатија, почнувајќи агресивна кампања за спас на своите поданици, народот.
Но, не е точно дека вакцината не е тестирана пред да биде одобрена. Тестирањето на вакцината на „Фајзер“ на пример, е спроведено во три фази за кои детали имаме објавено овде.
Во третата фаза на клиничкото испитување за „Фајзер“, 8 од 17.411 луѓе, кои ја примија вакцината се инфицирале со ковид, споредено со 162-ца од 17.511 кои примиле плацебо, односно не ја примиле вакцината.
Токму од овие информации, истражувачите утврдија дека вакцината е 95 проценти ефективна да превенира инфекција од ковид.
Дополнително, за да добие дозвола за употреба во итна состојба, вакцината мора да биде тестирана кај над 3 илјади испитаници и барем половината од нив да се следат повеќе од 2 месеца после втората доза.
Вакцината е безбедна и повеќе од 40 илјади индивидуи беа вклучени во клиничките тестирања, според македонското Министерство за здравство.
Во постот што го рецензираме лажно се тврди и дека политичарите глумеле дека се вакцинираат, што не е точно. Политичарите во земјава меѓу првите се вакцинираа и тоа пред камери, вклучително претставници на Владата, пратеници од Собранието.
Во постот се вели и:
„Почнаа секакви понуди на поткуп. Од бесплатни крофни за цела година, преку парични награди од мизерни 20€, па лотарии со награди дури и од големи суми, автомобили и сл.“
Во земјава никој не доделува автомобили, или награди или 20 евра за вакцинација. Во Северна Македонија такво нешто нема.
Понатаму се додава дека ,,врв на целата сегрегација и тотално бесмислена војна за нашето здравје беше воведувањето на пропусница, или таканаречениот зелен пасош, кој ќе им дозволи само на послушните да се движат, уште еднаш потврдувајќи дека не се работи за нашето здравје, туку за целосна контрола на населението, врз кое подоцна ќе бидат воведени нови елементи слични на пропусницата, или добро познатиот нацистички аусвајс.“
Воведување на вакцинални пасоши или потврди за извршена вакцинација има во многу земји од светот, не само кај нас и не станува збор за „целосна контрола“ на населението, зашто тие не дозволуваат невакцинираните лица да не можат да се движат само во затворени простои каде има многу луѓе и каде што шансите за пренос на вирусот се зголемени. Настрана што ако некој не сака да се вакцинира може само да се тестира редовно. Во постот лажно се тврди дека Франција брка од работа 300 илјади медицински работници. Вистината е дека
само 3 илјади медицински работници се суспендирани.
Лажно се тврди и дека антивакциналните протести се правело обид да се задушат што не е точно, на протестирачите им беше овозможувано да протестираат без никакви проблеми секој пат кога тоа ќе го посакаа, добиваа полициско обезбедување на протестот и ги заземаа улиците пред владата и собранието, исто како и другите протести. Лажно е и тврдењето дека докторите создаваат отпор кон вакцинацијата. Тие се највакцинираната група на работници од било која област зашто се секојденвно директно изложени на опасноста на вирусот.
Во земјава вакцинирани се 85 проценти од здравствените работници.
Потоа, во постот што го рецензираме се тврди и дека антивакциналните протести, кои беа организирани во земјава, биле доказ дека нема заразна болест која се шири, затоа што, како што резонира авторот, кога навистина би постоела таква болест (се мисли на ковид-19), тогаш протестите би станувале помали и помали, а не помасовни и помасовни.
Наспроти оваа манипулација, болниците и дневните статистики на Министерството за здравство покажуваа поинаква слика. Додека антиваксерите во Македонија протестираа, се случуваше дневно од ковид да починат и по 40 луѓе! Не може да се тврди или да се докаже дали учесниците во протестот се заразиле со ковид, или дека други луѓе доаѓале на секој следен протест. Логиката е неиздржана и манипулаторска, впрочем како и целата теорија на заговор околу ,,пландемијата”.
Станува збор за теорија на заговор со многу дупки поттикната од лица кои се претставуваат како освестени и просветлени, како што самите се нарекуваат ,,црни овци во општеството”, меѓутоа кои не ја сфаќаат сериозноста на пандемијата и со своите акции и делувања, предизвикуваат пандемијата уште подолго да трае. Ним не им се од значење дневните извештаи на починати и заразени, полните болници, истоштениот медицински персонал и финансиските импликации коишто пандемијата ги има на населението.
Во постот што го рецензираме, изнесени се повеќе дезинформации, прво таа за ПЦР тестот, како и тоа дека политичарите лажно се вакцинирале. На теоретичарите на заговори дури и со камера им беше вршен директен пренос од вакцинацијата на политичарите, но и тоа не им е доволно да поверуваат дека политичарите навистина примија вакцина. Неточно е и изнесеното во постот дека вакцината не е испитана. Целата теорија на заговор за непостоечката пландемија, се врши и врз грбот на медиумите, кои во текот на пандемијата известуваа секојдневно од многу ризични локации, како болници, ковид одделенија, црвени зони, гранични премини каде што во снег беа примопредавани донирани вакцини од Србија. На антивакциналните протести теоретичарите на заговори отворено ги нарекуваа медиумите платеници, што наиде на остра реакција од новинарскиот синдикат, којашто може да ја прочитате овде.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
