Рецензираме пост објавен на социјалната мрежа Фејсбук, а кој се однесува на видеоматеријал од протест кој неодамна се одржа во Сан Диего, Калифорнија.
Во рамките на постот има видео од настан во Калифорнија, што се одржал на 8 јануари 2022 година како конзервативен протест против задолжителна вакцинација „Фридам Ривајвал“.
Во видеоматеријалот прикажан во постот се гледа жена која зборува на португалски јазик, се движи во тревникот каде што се одвива протестниот собир и покажува поставени фотографии од млади луѓе, за кои недокажано тврди дека починале како последица на вакцината. Младите лица се со фотографии, име, возраст и датум на смртта, како и наводната вакцина која ги „убила“.
Во самиот пост, пак, се тврди:
Млади, жртви од вакцини. Зарем оваа глетка не е трогателна, да се стопира оваа вакцинална психоза. Ова не го гледате на телевизија и не го слушате на пресови од платениците на злото. Тие ве водат во темнината на стравот и сатанизмот, да ги жртвувате своите деца и внуци!
Но, ова видео на кое е презентиран настан организиран во чест на наводните жртви од вакцините против ковид-19 низ целиот свет, не прикажува лица за кои е докажано дека починале како последица на вакцината!
Повеќе странски портали за проверка на факти, се осврнуваат на еден конкретен случај, односно на едно од децата кое се појавува во видеото и е претставено како да починало од вакцина. Станува збор за тринаесетгодишниот Бразилец, Вевертон Силва (на 1 минута и 47 секунда од видеото).
Националната агенција за надзор на здравјето АНВИСА соопштила дека смртта на Бразилецот не е поврзана со вакцинацијата од производителот „Фајзер“. Сепак неговата фотографија се најде на протестот во Сан Диего, а беше злоупотребена во антивакцинална кампања за да се промовираат наводните смртни последици од вакцините против ковид-19 врз младите. Смртта на намалку уште две млади лица кои се споменуваат во видеото како жртви, исто така, не е поврзана со вакцинацијата.
Тринаесетгодишниот Силва починал на 8 октомври 2021 година 45 дена по земањето на првата доза од вакцината на „Фајзер“. Секторот за здравство на општината Вале до Анари соопшти дека сите информации се проследени до лекарска комисија формирана од Министерството за здравство и АНВИСА. Според АНВИСА, случајот со младото момче е истражен и заклучено е дека нема причинско последична врска меѓу вакцинацијата и смртта. Според анализата на агенцијата, други фактори придонеле за смртта на тинејџерот. Во истрагата на АНВИСА смртта беше класифицирана како онаква којашто не е во временска врска со имунизацијата, што значи дека таа ,,произлегува од претходни или појавни состојби предизвикани од други фактори, а не од вакцината”. Такви примери се употреба на други лекови, заболувања итн. Агенцијата потврдила дека младиот бразилец кој почина на 8 октомври имал срцев удар и респираторна инсуфициенција, а според мајката на момчето, имало семејна историја на смртни случаи кои се случиле во слични околности.
Во видеото се појавуваат и фотографии од други лица и кога ќе се пребараат на интернет, водат до веб- страници против вакцинацијата, а во владините агенции нема воопшто информации дека смртта била предизвикана од вакцината. Оттаму, не е возможно да се докаже врската меѓу смртта и вакцината во овие случаи.
Во Бразил, според Министерството за здравство нема смртни случаи предизвикани од вакцините против ковид-19 во возрасната категорија меѓу 12 и 18 години.
Друго лице од видеото кое се појавува во постот што го рецензираме, е младиот Давиде Бистот кој имал 18 години и починал во јули 2021 година во Венето Италија. Тој бил син на италијански одбојкар, во италијанските медиуми неговата смрт беше објавена без никакво споменување на хипотезата дека смртта се должи на вакцинацијата.
Друга Италијанка чие име се појавува во видеото како наводна жртва на вакцината е Мајда Ел Азрак, на возраст од 14 години која втората доза „Фајзер“ ја примила на 17 август 2021 година. Според информациите од медиумите, на младата девојка наредниот ден ѝ се слошило, а на 19 август отишла на преглед во болница во градот Трикасе. На прегледот е утврдено присуство на тумор, подоцна девојчето паднало на кома и починало на 20 август. Случајот бил затворен од јавното обвинителство на 21 декември откако обдукцијата не утврдила врска меѓу смртта и вакцинацијата.
Поради сите горенаведени факти, оценуваме дека барем три од лицата кои се појавуваат во видеото што го рецензираме, не починале како последица на вакцината. За тројца од младите луѓе прикажани на видеото е утврдено дека вакцината не била причинител на смртта, туку тоа биле други состојби, коморбидитети или околности.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
