Македонија ја доби новата влада

Со 70 гласови за, пратениците го поддржаа владиниот кабинет кој по трет пат го предводи премиерот Никола Груевски. Од присутните 117 пратеници, 47 гласаа против, а немаше воздржани. По свечените изјави, премиерот и министрите заминаа на свечен прием кај претседателот Ѓорѓе Иванов.

Новиот владин тим е составен од 15 министри од ВМРО-ДПМНЕ и ДУИ. Во шест ресори остануваат исти министри – Гордана Јанкулоска за внатрешни работи, Зоран Ставрески за финансии, Елизабета Канческа-Милевска за култура, Миле Јанакиески за транспорт и врски, Иво Ивановски за информатичко општество и администрација и Љупчо Димовски за земјоделство.

Спиро Ристовски е нов министер за труд и социјална политика. Никола Тодоров ќе го води ресорот здравство, Фатмир Бесими е нов министер за одбрана, Абдилаќим Адеми за животна средина. Блерим Беџети и Невзат Бејта, се нови членови на Владата и ќе ги водат Министерството за правда, односно за локална самоуправа.

Никола Попоски е новиот министер за надворешни работи, Панче Кралев за образование и наука и Ваљон Сарачини – министер за економија. Премиерот Никола Груевски синоќа по изборот не даде изјава за медиумите. За владините политичко економски приоритети зборуваа дел од министрите.