Македонија на 74-то место на листата најеколошки земји

Македонија е рангирана на 74 место на листата еколошки најчисти земји во светот, а во европски рамки е на самото дно.

Рангирањето, како што јавува Макфакс, е врз основа на индексот на еколошки резултати (EPI), направено од универзитетите Јејл и Колумбија.

Со 74 индексни поени од можните 100, Македонија е 74-та на листата еколошки најчисти земји во светот од рангираните 149 држави.

Во европски рамки, Македонија е 37 од вкупно рангираните 40 држави. Зад Македонија се само Украина, Романија и Молдова.

Центарот за меѓународна научна информациска мрежа на Универзитетот Колумбија и Центарот за еколошко право и политика на Универзитетот Јејл развија Индекс на еколошки резултати со цел да ги истакнат најчистите земји, и да дадат насоки за оние кои заостануваат како да ја подобрат Животната средина и здравјето на своите граѓани.

Швајцарија е на чело на светската еколошка листа со индекс 95. Следат Шведска, Норвешка и Финска.

Словенија е на 15 место, Хрватска – 20, Албанија – 25, Грција – 44, БиХ -48, Бугарија – 56, а Турција -72. Србија не е рангирана.

Меѓу неевропските држави во првите 20 се Костарика – 5, Нов Зеланд – 7 и Колумбија – 9. САД се рангирани на 39 место.

Истражувачите на индексот EPI нагласија дека информациите врз чија основа е направена ранг листата потекнуваат од локални извори и не се секогаш со идеален квалитет, особено во земјите во развој.

Рангирани се вкупно 149 држави, а другите 50 се изоставени поради нецелосни податоци.

{loadposition content9}