Facebook & Co. – со најмногу пријави за злоупотреба

Во Македонија, во случај да се утврди злоупотреба на податоци казните се високи. Во 2009 до Дирекцијата за заштита на личните податоци пријава за злоупотреба на лични податоци на интернет дале 130 лица, најчесто од мрежите за дружење како Facebook.

Интернет револуцијата во Македонија, по обичај ги донесе придобивките, ама и лошите нешта. Податоците говорат дека 53 проценти од населението користи интернет. За кусо време социјалните портали од типот на Skype, My space или Facebook им влегоа под кожа на Македонците. За едни тое е потреба, за други забава, а за трети интернетот бескончено место за малверзации, дискредитации и злоупотреби.

„Младите од секогаш биле љубопитни и сакале да се служат со недозволени средства. Но, порано тие содржини најчесто доаѓале преку весници и други списанија. Со напредокот на технологијата ги смениле само начините. Тие се сега побрзи и поинтересни за нив и затоа ги користат,“ вели педагог Славица Илиќ, директор на основно училиште во Охрид.

Во 2009 до Дирекцијата за заштита на личните податоци пријава за злоупотреба на лични податоци на интернет дале 130 лица, најчесто од мрежите за дружење како Facebook. Најчесто им се крадат лозинките, корисничкото име, па се’ до кражба на идентитетот. Ние контактираме со администраторите, открива портпаролот Елена Стојановска: „Особено треба да бидеме претпазливи што прават децата на интернет кога станува збор за портали регистрирани надвор од Македонија, зашто таму ниту полицијата, ниту дирекцијата можат да имаат конкретна надлежност, “ додава Стојановска.

Дирекцијата за спречување на злоупотреба на личните податоци отпочна кампања за подигање на свеста, пред се’ кај учениците, за да внимаваат при дружбата на интернет. Ваква акција покрена и Црвениот крст – Охрид. Анета Јованоска е координатор на младите и мајка на две деца кои се во пубертет. Таа признава дека мрежите за дружење се злоупотребуваат: „Јасно ни е на сите дека има вулгаризми и навреди. Тоа може да се надмине само со поголема контрола на родителот врз децата. Да гледа кои сајтови ги посетува, со кого комуницира и што пишува детето на интерет и во својот профил.“

Казните за злоупотреба на личните податоци преку интернет, ако се докажaт се високи, од 900 до 4.000 евра или една година затвор за сторителот на делото.
{loadposition content9}