Државниот врв ќе гради став за предлозите на Нимиц

Претседателот Бранко Црвенковски и премиерот Никола Груевски денеска на заедничка координативна средба повторно ќе го разгледуваат последниот сет идеи на медијаторот Метју Нимиц за решавање на спорот за името.

Ова е втора координативна средба на државниот врв за името во изминатите десетина дена. На претходната, одржана на 16 октомври, претседателот Црвенковски, премиерот Груевски и специјалниот пратеник за името Никола Димитров, како што беше соопштено по средбата, направија анализа на пакетот идеи на Нимиц презентиран во Њујорк на 8-ми овој месец, но не го дефинираа одговорот на Република Македонија туку оставија време за дополнителни консултации.

И Црвенковски и Груевски во првичните реакции кажаа дека без сериозни измени предлозите на медијаторот не се добра основа за доаѓање до најсоодветно решение. Македонија, како што нагласија, е подготвена на фер компромис, но не по секоја цена и со диктат и омаловажување.

Во Скопје предлогот на Нимиц се оценува како прогрчки и неповолен за Македонија.