Пациентката на која и беше трансплантирано срце е во добра состојба

Министерот за здравство Венко Филипче денеска изјави дека состојбата на пациентката на која и беше трансплантирано срце од мртов донор е стабилна и дека сите параметри се добри.

– Сите параметри кои произлегуваат од анализите направени заклучно со денес, се добри и сите се во фаза на подобрување, така што очекувам дека денес може постепено да се ослободува од респираторната машина, изјави Филипче, одговарајќи на новинарски прашања по настан организиран од Универзитетската клиника за детски болести по повод Светскиот ден на детето.

Во неделата беше извршена третата трансплантација на срце во земјава. Операцијата траеше пет часа, а донираното срце беше трансплантирано кај 39-годишна пациентка.