Ценовникот на услуги на МПЦ, „солен“

Православните верници во земјава се изложени на најголеми трошоци кога станува збор за венчавка, погреб, крштевка или слава, наспроти поевтиниот ценовник на Исламската верска заедница и либералниот ценовник на Католичката црква во Македонија, пренесува „Инфо+“ порталот.

Според ценовникот на Македонската православна црква, од 1.500 до 3.000 денари плаќа семејството на покојникот, ако на погребот пее еден поп. Цената двојно се зголемува, ако дојде уште еден поп. Свеќите се купуваат, бидејќи така требало велат од Скопската епархија. Две илјади и четиристотини денари чини литургија во црква, кога му се оддаваат 40 дена на покојниот.

Крштевката чини 3.000 денари или 50 евра, плус свеќите. Родителите на новороденчето плаќаат 1.000, а кумот 2.000 денари. Трите свеќи за кршевката чинат 120 денари.

Венчавката е поскапа. Во зависност од тоа дали пее еден поп или владика, цените се движат од 50 до 100 евра, плус другите црковни трошоци. Ослободување од плаќање важи само за социјално-загрозените семејства, кои имаат потврда дека примаат социјална помош.

Во исламскиот свет, пак, постои цена само за погреб и за свадба. Ако оџа дојде на погреб, за неговото молење се плаќа 3.000 денари. За сунет семејството не плаќа, но може да му даде бакшиш на оџата. Да дојде оџа во домот на идните сопружници чини 1.000 денари, а тој и двајца сведоци потпишуваат „Ниќах“, или писмен муслимански договор, според кој, ако евентуално се разведат, се наведува сумата која ќе ја добие невестата како отштета од сопругот или од неговото семејство.

– Католичката црква во Македонија, за погреб и свадба наплаќа 700 денари. За крштевка не се наплаќа бидејќи тоа е убав момент, кога во верата се прима нов член. Кај нас постои парохиска помош. Тоа значи дека после секоја неделна миса, верниците оставаат кој колку има помош за црквата. Ако немаат да платат за некој верски обред, здравје, затоа сме ние, но нашите верници може, наместо пари, да подарат и помош како облека или јадење, за другите врници – вели отец Марјан Ристов од Католичката црква во Македонија.

Отец Драги од Соборниот храм во Скопје, вели дека лично не се согласува со цените кои ги има МПЦ, но нагласува дека и поповите се луѓе, и дека и тие треба да живеат, а кога плаќаат во продавница или сметки за струја, никој не ги прашува дали имаат или немаат.

– Во социјализмот, луѓето оставаа и голем бакшиш. Во една пригода ми се случи, за еден ден, да заработам колку што чинеа 50 вреќи цемент. Сега се други времиња. Тоа што за нас поповите, според овој ценовник е малку, за верниците е многу. Но, ние пред сè, само се финансираме од верниците. Не сме како Католичката црква, која има дирекни донации од Ватикан. Нивните свештени лица овде имаат автомобил, стан, јадење и пиење плус послуга. Затоа и имаат таков ценовник. А што им е задача? Задача им е да придобијат што е можно повеќе верници кон себе – вели отец Драги.

Ценовникот за услугите од МПЦ, во Македонија и во дијаспората не се исти. Во странство, православните верници, секој посебно без разлика за колкаво семејство станува збор, велат од Скопската епархија, плаќа годишна пароиска такса која се движи околу 150 долари во САД, 20 канадски долари во Канада и 50 австралиски долари во Австралија и Нов Зеланд, а плус плаќаат за свадба, крштевка, именден или погреб, пренесува „Инфо+“ порталот.

{loadposition content9}