Македонските власти дебелината кај децата ќе ја решаваат со реклами

Седумгодишните деца во Македонија се најдебели, при што опасноста за нарушување на нивното здравје се зголемува уште од мали нозе. Со вакви податоци за 2010 година располага Институтот за јавно здравје, додека втори на листата се децата во предучилишна возраст, а веднаш по нив следат петооделенците. Мал процент од средношколците во земјава се вбројуваат во категоријата на дебелите деца.

Додека Европската комисија веќе ја почна борбата против дебелината и формираше Европска платформа за диета, физичка активност и здравје,  македонските власти дебелината кај децата ќе ја спречуваат само со промотивни кампањи и реклами.

Нездравата и мрсна храна, газираните сокови и недостатокот на физичка активност се главните причини за дебелината на децата од мали нозе, алармираат лекарите. Според нив многу ретко кај младите можат да се искоренат навиките во исхраната, па наместо овошје и зеленчук, тие се почесто конзумираат брза храна, хамбургери, кока кола. Познавачите апелираат дека само навремената превенција на дебелината во раното детство, би ги спречила и последиците од неа – во спротивно таа ќе биде присутна и во подоцнежна возраст, со здравствени проблеми.

Лекарите редовно ги советуваат родителите дека исхраната на нивните деца треба да биде богата со протеини, јаглехидрати, витамини и минерали. Мастите според нив, треба да се внесуваат преку млечните производи, рибата и растенијата, а не преку месо, пржена храна и мајонез. На светско ниво постои епидемија на дебелина кај децата, дури 42 милиони деца се соочуваат со проблемот на преголема тежина. Во Европа таа броја се движи околу 14 милиони деца.

{loadposition content9}