Експлозија на бомба пред канцеларијата на братот на Дора Бакојани

Рачно изработена бомба експлодира ноќеска пред канцеларијата на пратеникот на грчката владејачка партија Нова демократија, Киријакос Мицотакис во Атина, предизвикувајќи само материјална штета, соопшти локалната полиција.
Бомбата експлодирала на скалите пред канцеларијата на 41-годишниот Мицитакис, кој инаку е брат на грчкиот министер за надворешни работи Дора Бакојани и син на поранешниот премиер Константинос Мицотакис.

Полицијата информира дека за време на експлозијата во зградата во која се наоѓа канцеларијата немало никого, напоменувајќи дека не добила предупредување за нападот, како и дека досега никој не презел одговорност за подметнувањето на бомбата.
Минатата недела бомби експлодираа пред две филијали на „Ситибанк“ во Атина, за што одговорност презеде грчката герилска организација Револуционерна борба. Оваа милитантна група досега има преземено одговорност за напади врз полициски станици и неколку министерства, како и врз Американската амбасада во Атина во 2007 година.

{loadposition content9}