Противпожарната единица од Охрид доби нова опрема

Противпожарната единица од Охрид доби нова опрема. Преку донација од противпожарната од  Лејден -Холандија пожарникарите добија заштитни одела, чизми и наочари со кои ќе се зголеми нивната безбедност при гаснење на пожари.

–Ваква опрема не ќе можевме уште многу години да набавиме, тоа не ќе можеше да го стори ниту Локалната бидејќи е многу слкапа. Едно одело чини 1500 евра. Оваа опрема е користена, но е од 2009, 2010 и 2011год., а онаa која ја имаме ние е стара 20год. А сепак со неа пожарникарите одеа на интервенции. Затоа оваа донација за нас многу значи, вели Спасе Прентоски, командирот на ПЕ Охрид.

Градоначалникот Никола Бакрачески изрази голема благодарност за оваа донација и рече дека се надева оти ова ќе биде само почеток на соработката помеѓу противпожарнитер единици на Охрид и Лејден.
–Градот Охрид односно граѓаните се стекнаа со драгоцена помош, а посебно противпожарната единица од Охрид затоа сакам да изразам огромна благодарност кон овие хумани луѓе, рече Бакрачески.

Командирот на ПЕ од Лејден, Том Кот рече дека се започнало од една случајна средба минатата година кога биле дојдени во Охрид при што ја посетиле и пожарната. Тогаш виделе дека опремата на нивните колеги е застарена и им ветиле дека ќе им помогнат.

–Во нашата земја пожарникарските чевли и одела ги менуваме на секои пет години. Имавме многу опрема која беше користена и ставена во магацини, а која  сеуште може да се употребува. Затоа решивме да ја донираме на ПЕ од Охрид, вели командирот на ПЕ од Лејден.

Дел од опремата охридските пожарникари им ја подарија на своите колеги во Струга бидејќи и таму состојбата со заштитни одела и специјални обувки не е розова.

{loadposition content9}