Навивачите во Англија бесни, Вест Хeм прв попушти

Вест Хем го направи првиот чекор за помирување со лутите англиски фудбалски навивачи. Клубовите се сѐ побогати, а цените на билетите поскапи. Затоа мнозинството навивачи се огорчени и разочарани во модерниот англиски фудбал. Причината е големиот прилив на пари од ТВ правата. Sky и BT Sport палатиле преку 5 милијарди фунти за три сезони што на клубовите ќе им донесе неверојатно големи суми на пари.

Во источен Лондон, клубот на работничката класа одлучи да го направи единственото логично, а тоа е дека во сезоната 2016/2017 годишните влезници ќе бидат поевтини. Најевтиниот сезонски билет за натпреварите на Вест Хем ќе изнесува 289 фунти, што е за двојно помалку отколку оваа сезона. Исто така, од наредната сезона клубот се сели на нов стадион кој за разлика од сегашниот Аптон Парк кој собира 35.000 гледачи, ќе има капацитет од 50.000 навивачи.

И останатите навивачи ширум Англија се надеваат дека еднаш мора да престане најголемата болка на модерниот фудбал – прескапите влезници. Фудбалот на островото е фамилијарна традиција, а многу фамилии едноставно немаат пари за купување на годишни влезници. Навивачите се лути, а кулминација на бунтот видовме кога навивачите на Кристал Палас извадоа феноменален транспарент за алчноста на премиерлигашите.

Во здружението на англиските навивачи (Football Supporters Federation) велат дека го поздравуваат потегот на Вест Хем, но се надеваат дека ќе ги намалат и цените на поединечните натпревари, како и за билетите на гостувањата кои често биле користени за да се заработи на гостинските навивачи.

Англиските прволигаши добиваат најмногу пари во цела Европа од ТВ правата, а често запрепастувачки звучи кога ќе чуеме колкава сума одвоил некој клуб за некој играч. Пари очигледно имаат и затоа тамошните љубители на фудбалот сакаат клубовите да престанат да заработуваат на оние поради кои се тука – фудбалските навивачи.

{loadposition content9}