На охридските плажи нема знаци кои ќе ги предупредат капачите

Плажите се омилено место во овие екстремно жешки денови, но малкумина знаат дека кријат и безброј опасности. Капачите не знаат каква е конфигурацијата на дното на езерото, каде има карпи, а каде песок, колку е длабочината на водата на одредени места, кои се црни точки, дали има подземни извори и вртлози, дали на оние плажи каде има мост тој е безбеден и тн. Не беше така одамна кога на плажите, посебно на оние уредените и покрај хотелските комплекси постоеја знаци од кои можеа да се добијат вакви информации. Сега од некогашните обележја нема ниту траг, а нови не се сетил никој да постави.
Ние секогаш пред сезона вршиме увид на капалиштата за да видиме дали се обезбедени, колкаво е нивото на водата со цел да дадеме одредени препораки и совети. Но самите концесионери согласно правилникот за обележување на капалиштата се должни да истакнат знаци дека овде не е дозволено скокање, дека скалите се лизгави, дека мостот не е во функција или пак е во функција, вели Сашо Точков, претседател на ЦК Охрид.
Нема лето, а да не се случат несреќи на охридските плажи. За жал некои од нив со фатален крај. Неодамна 35 годишно момче скокајќи на плажа кај Лагадин ја повреди главата во карпа и поради тешките повреди го загуби животот. Можеби доколку имаше некакво предупредување дека на тоа место дното е карпесто не ќе дојдеше до тоа. Многу често може да се забележи како малолетници скокаат од мост кој воопшто не е безбеден, па пред да скокнат во вода ќе се повредат или ќе ја заглават ногата помеѓу штиците кои се трули и се распаѓаат.

За жал на многу мал број плажи имаме такви знаци, а од друга страна има знаци дека не може да се влегува со костум за капење во објектот, а немаме знаци за тоа каква е водата или каква е конфигурацијата на теренот, објаснува Точков.

Од Спасувачката служба на вода сугерираат на оние плажи кои ќе бидат дадени под концесија, привремените сопственици да се погрижат за нивното обележување. А останатите кои се под општина таа да постави знаци и на некој начин да ја подобри безбедноста на посетителите.